Þorski landað í höfninni í Peterhead í Skotlandi. mbl.is

Skoskir sjómenn ætla að halda fjöldafund í næstu viku og leggja þar á ráðin um næstu skref í makrílstríðinu svonefnda við Íslendinga og Færeyinga. Blaðið Scotsman segir frá þessu í dag. Í ágúst komu skoskir sjómenn í veg fyrir að makríl væri landað úr tveimur færeyskum skipum í Peterhead.

Scotsman segir, að fundurinn verði haldinn á mánudag í Fraserburgh og munu forustumenn skoska úthafsveiðisambandsins og skoska sjómannasambandsins ávarpa fundinn. 

Blaðið hefur eftir Ian Gatt, formanni úthafsveiðisambandsins, að mikilvægt sé að lausn finnist á deilunni hið fyrsta. Hins vegar sé ljóst, að skoskir sjómenn sætti sig ekki við niðurstöðu, sem gangi gegn þeirra hagsmunum. Þá verði að samkomulagið einnig að tryggja að veiðar úr makrílstofninum séu sjálfbærar.

Blaðið hefur eftir Richard Lochhead, sjávarútvegsráðherra skosku heimastjórnarinnar, að nauðsynlegt sé að finna lausn á deilunni. Sagði hann, að skoskir embættismenn ættu nú í viðræðum við Færeyinga með það að markmiði að fá þá til að endurskoða veiðikvóta sem þeir gáfu út. Aðildarríki Evrópusambandsins komi einnig að þeim viðræðum. Þá segir hann, að búist sé við að viðræður haldi áfram við Íslendinga síðar í september. 

„En það er ástæða til að hafa áhyggjur af einstrengingslegri afstöðu Íslands. Með því að reyna að réttlæta einhliða aðgerðir sínar hafa Íslendingar aðeins undirstrikað að þeir vilja ekki ná raunhæfri málamiðlun," hefur blaðið eftir ráðherranum.

Skoskir sjómenn eru æfir yfir því, að Færeyingar ákváðu að gefa út allt að 85 þúsund tonna makrílkvóta fyrir færeysk skip og Íslendingar allt að 130 þúsund tonna kvóta fyrir íslensk skip.