Þorgerður Katrín Gunnarsdóttir, fyrrverandi menntamálaráðherra, telur að skoða þurfi hvort gera eigi breytingu á skipan ríkisstjórnar þannig að tryggt sé að í stórum málum sé öll ríkisstjórnin upplýst og meðvituð um þá ábyrgð sem fylgir því að sitja í ríkisstjórn Íslands.
Þetta kemur fram í svari sem hún sendi þingmannanefnd Alþingis. Í svarinu áréttar Þorgerður það sem margoft hefur verið sagt að ríkisstjórn Íslands er ekki fjölskipað stjórnvald. Það þýðir að ráðherra ber ábyrgð á sínum málaflokki en ekki á málaflokkum sem heyra undir aðra ráðherra.
Þorgerður segir að af lestri rannsóknarskýrslu Alþingis megi draga þá ályktun að það verklag sem hefur verið viðhaft í ríkisstjórnum hér á landi þurfi að taka til alvarlegrar skoðunar.
„Athuga þarf hvort rétt sé að halda í núverandi kerfi þ.e. að ríkisstjórnin sé fjölskipað stjórnvald eða hvort hægt sé að breyta því formi með einhverjum hætti svo tryggt verði að í stórum málum verði ríkisstjórnin upplýst og meðvituð um þá ábyrgð, stjórnskipulega sem pólitíska, er fylgir því að sitja í ríkisstjórn Íslands. Einnig tel ég rétt að skoðað verði hvort ekki eigi að formgera betur samráðsferli ráðherra. Í öllu falli þarf að koma í veg fyrir að pólitískir duttlungar og hentisemi ráði för í stórum og þýðingarmiklum hagsmunamálum lands og þjóðar.“