mbl.is/Júlíus

Skólayfirvöld Menntaskólans í Kópavogi tilkynntu lögreglunni um atvik sem varð sl. fimmtudag þegar hópur unglingspilta mætti í skólann til að ræða við einn nemenda vegna ógætilegra ummæla. Lögreglan segir að skólayfirvöld hafi tekið á málinu innan skólans og að deiluaðilar hafi skilið sáttir. 

Atvikið tengist pilti af kúbverskum uppruna, sem hefur nú flúið land á ásamt föður sínum. Lögreglan í Kópavogi segir að atvikið hafi ekki snúist um kynþáttafordóma heldur sé það byggt á misskilningi. Engin átök hafi brotist út á skólalóðinni heldur hafi skólayfirvöld tekið til sinna ráða og rætt við deiluaðilana.

Lögreglan segir að pilturinn, sem er farinn úr landi, hafi átt í sambandi við stúlku sem gengur í skólann. Annar piltur, sem sé nemandi við MK, hafi látið ákveðin orð falla sem hafi farið fyrir brjóstið á kúbverska piltinum. Lögreglan segir að félagar hans hafi ákveðið að heimsækja skólann til að ræða við þann sem lét ummælin falla. Þeir fengu hins vegar ekki tækifæri til þess vegna inngripa skólayfirvalda.

Að sögn lögreglu mætti kúbverski pilturinn ekki í skólann heldur aðeins félagar hans. Skólayfirvöld ræddu við deiluaðilana í framhaldinu og segir lögreglan að þeir hafi skilið sáttir. Drengurinn sem lét ummælin falla og kúbverski pilturinn ræddust við símleiðis.

Lögreglan var ekki kölluð á staðinn heldur fékk upplýsingar í gegnum skólann. Hún segist ekki kannast við það að piltarnir, sem mættu í MK, sjö til átta talsins, hafi verið vopnaðir.