Lögreglumenn við umferðareftirlit. Myndin er úr safni. mbl.is/Júlíus

Allmargir ökumenn voru teknir fyrir hraðakstur víðsvegar á höfuðborgarsvæðinu um helgina en í allra grófustu brotunum var ekið á 40-50 km hraða umfram leyfðan hámarkshraða, segir lögregla í tilkynningu.

Meirihluti hinna brotlegu voru karlar en ökumennirnir eru á ýmsum aldri. Yngst var 17 ára stúlka en elstur liðlega áttræður karl en sá hefur nokkrum sinnum áður gerst sekur um umferðarlagabrot. Sama á við um karl á þrítugsaldri sem var stöðvaður á Reykjanesbraut á móts við Hvassahraun en þar mældist bíll hans á tæplega 140 km hraða.

Lögreglan hafði einnig afskipti af ökumönnum sem töluðu í síma án þess að notast við handfrjálsan búnað og þá var nokkrum próflausum ökumönnum gert að hætta akstri. Í þeim hópi var 16 ára piltur sem hafði tekið fjölskyldubílinn traustataki og farið á rúntinn.

Þá voru níu ökumenn voru teknir fyrir ölvunarakstur á höfuðborgarsvæðinu um helgina. Fjórir voru stöðvaðir í Reykjavík, þrír í Hafnarfirði og einn í Kópavogi og Kjósarhreppi. Einn var tekinn á föstudagskvöld, þrír á laugardag, fjórir á sunnudag og einn aðfaranótt mánudags. Þetta voru allt karlar en þeir á aldrinum 19-59 ára. Tveir þeirra höfðu þegar verið sviptir ökuleyfi.
 
Auk þess voru tveir ökumenn teknir á höfuðborgarsvæðinu fyrir að aka undir áhrifum fíkniefna. Báðir voru stöðvaðir á sunnudag, annar í Reykjavík en hinn í Hafnarfirði. Þetta voru tveir karlar á þrítugsaldri. Annar þeirra hafði þegar verið sviptur ökuleyfi en í fórum hans fundust einnig fíkniefni.