Jarðgöngin milli Bolungarvíkur og Hnífsdals heita Óshlíðargöng. mynd/bb.is

Samkvæmt skilti sem stillt hefur verið upp við jarðgöngin á milli Hnífsdals og Bolungarvíkur bera þau nafnið Óshlíðargöng. Fram kemur á vefnum bb.is, að nafnið veki athygli þar sem mikið hafi verið rætt um nafngiftina á sínum tíma.

Kristján L. Möller, þáverandi samgönguráðherra, tók það fram í nóvember 2007 að göngin myndu heita Bolungarvíkurgöng, en ekki Óshlíðargöng. Hins vegar var talað um Óshlíðargöng í útboðsgögnum Vegagerðarinnar. 

Fyrir tæpum tveimur árum voru sett upp kynningarskilti á framkvæmdinni þar sem göngin voru kölluð Óshlíðargöng í stað Bolungarvíkurganga. Gísli Eiríksson, umdæmisstjóri Vegagerðarinnar á Ísafirði, sagði þá að ekki væri um misskilning að ræða milli Vegagerðarinnar og samgönguráðuneytisins varðandi heitið á göngunum.

Göngin eru um 5,1 km löng í bergi og heildarlengd vegskála er um 0,3 km, samtals er því um að ræða 5,4 km göng sem halla rúm 2% til beggja enda. Verkið nær ennfremur til lagningar nýs vegar fyrir neðan byggðina í Hnífsdal og vegkafla frá Ósi og inn í Bolungarvík. Byggðar voru tvær brýr; yfir Hnífsdalsá og Ósá í Bolungarvík. Í gegnum göngin liggja ýmsir strengir, m.a. 66 KV háspennustrengur sem leysir af hólmi háspennuloftlínu. Þversnið ganganna er hringlaga og er breidd þeirra um 8 m í veghæð en leyfileg hæð ökutækja er 4,2 m.