Sumir saltfiskframleiðendur nota fjölfosfat við vinnsluna. mbl.is/Kristján Kristjánsson

Matvælastofnun telur óheimilt að nota fjölfosfat við saltfiskvinnslu. Stofnunin hefur hins vegar ákveðið að hinkra eftir niðurstöðu sérfræðinganefndar Evrópusambandsins sem fjallar um ósk framleiðenda efnanna um að heimila þau.

Fiskverkun Karls Sveinssonar á Borgarfirði eystra hefur ekki viljað nota þessi efni og telur sig verða fyrir miklu fjárhagstjóni vegna þess að Matvælastofnun framfylgir ekki banni við notkun þeirra. Fyrirtækið hefur sagt upp öllu starfsfólki sínu og hyggst óska eftir opinberri rannsókn á starfsháttum starfsmanna Matvælastofnunar.

Sigurður Örn Hansson, forstöðumaður matvælaöryggis- og neytendamálasviðs Matvælastofnunar, segir vitað að fjölfosfat sé notað í einhverju mæli við saltfiskvinnslu hér á landi. Efnið gerir fiskinn hvítari. Hann segir að gerð hafi verið athugasemd við það, bæði almennt með tilkynningum á heimasíðum Fiskistofu og Matvælastofnunar, og við einstök fyrirtæki.

„Það er deila um það hvort þetta sé aukefni eða tæknilegt hjálparefni. Við túlkum reglurnar þannig að þetta sé aukefni. Þá er óheimilt að nota það í saltfiski samkvæmt reglugerð um aukefni,“ segir Sigurður Örn.

Hann segir að efnið sé notað í nágrannalöndunum og Matvælastofnun hafi verið í sambandi við systurstofnanir sínar um viðbrögð, síðast á fundi í febrúar sl. „Þar kom fram að ekki hefur verið gripið til strangari aðgerða vegna notkunar á þessum efnum, meðal annars vegna þess að framleiðandi efnisins hefur sótt um það til Evrópusambandsins að aukefnareglugerðinni verði breytt þannig að notkun þess verði heimil í saltfiskframleiðslu,“ segir Sigurður Örn.

Matvælastofnun hafi í þessu ljósi ákveðið að bíða með frekari aðgerðir eftir niðurstöðu sérfræðinganefndar ESB sem metur það hvort heimilt verði að breyta reglugerðinni eða ekki. „Sérfræðinganefndin hefur ekki lokið störfum og hefur óskað eftir frekari gögnum frá framleiðanda, eftir því sem við höfum frétt,“ segir Sigurður.