Sveinn Andri Sveinsson, lögmaður Jóns Hilmars Hallgrímssonar, sem sat í gæsluvarðhaldi í tengslum við rannsókn lögreglu á árásum á kúbverska feðga í Reykjavík, segir Jón Hilmar blessunarlega lausan við fordóma í garð fólks af öðrum kynþætti eða þjóðerni og það síðasta sem hann myndi gera væri að kynda undir kynþáttaofsóknum.

Þetta er meðal þess sem fram kemur í athugasemd sem Sveinn Andri hefur sent frá sér vegna umfjöllunar fjölmiðla um málið. Segir Sveinn Andri að ungur frændi Jóns Hilmars hafi verið í hópi ungmenna í Menntaskólanum í Kópavogi sem stóð stuggur af þeim hópi ungmenna sem tók sér stöðu með kúbverska drengnum. Jón hafi haft símasamband við umræddan kúbverska pilt, að sögn Sveins Andra, til þess að freista þess að róa málin.

Líkt og fram kom í frétt mbl.is á mánudag er Jón Hilmar er grunaður um að hafa hótað feðgum af kúbverskum uppruna lífláti og valdið eignaspjöllum á heimili þeirra.  Hann hefur komið við sögu lögreglunnar, meðal annars vegna ásakana um svonefndar handrukkanir.

Feðgarnir fóru úr landi á sunnudag vegna málsins en skemmdarverk voru framin á heimili þeirra á laugardag og þeim hótað lífláti. Báðir eru þeir íslenskir ríkisborgarar, en kveikja málsins virðist vera sú að pilturinn hefur átt vingott við íslenska stúlku.

Fram hefur komið, að samband ungmennanna hafi vakið upp annarleg viðhorf og kynþáttafordóma,  meðal annars í Menntaskólanum í Kópavogi þar sem stúlkan stundar nám.

Yfirlýsing Sveins Andra Sveinssonar í heild:

„Í tilefni af fjölmiðlaumfjöllun undanfarinna daga sér undirritaður f.h. Jóns Hilmars Hallgrímssonar sig tilneyddan til þess að koma að athugasemdum vegna sérlega óvandaðs fréttaflutnings í fjölmiðlum í tilefni af meintum kynþáttaofsóknum gegn Íslendingum af kúbverskum uppruna.

Tildrög málsins eru erjur milli hópa ungmenna í Menntaskólanum í Kópavogi. Ungur frændi Jóns Hilmars var í öðrum hópnum og hafði samband við Jón þar sem honum stóð stuggur af þeim hópi ungmenna sem tekið hafði sér stöðu með hinum kúbverska dreng.

Jón hafði símasamband við umræddan kúbverskan pilt til þess að freista þess að róa málin en hafði ekki erindi sem erfiði.

Í fjölmiðlum hefur tveimur staðhæfingum verið slegið fram sem staðreyndum; annars vegar að umbj. minn hafi ráðist inn á heimili hinnar kúbversku fjölskyldu og framið þar eignaspjöll og hins vegar að hann hafi haft í hótunum við piltinn kúbverska.

Í tvö skipti voru framin eignaspjöll; í fyrra skiptið var á ferðinni hópur unglinga með golfkylfur og fleiri áhöld og brutu rúður í húsinu. Í síðara skiptið var útihurð brotin upp með slökkviliðstæki. Fyrir liggur að umbj. minn var hvorugt skiptið nálægt umræddu húsi og ljóst að umræddir aðilar voru ekki á vegum Jóns eða að gera eitthvað að hans beiðni.

Jón Hilmar hefur aldrei haft í hótunum við hina kúbversku fjölskyldu, hvorki fyrr né síðar. Þvert á móti reyndi hann að stilla til friðar en uppskar aðeins hótanir og svívirðingar.

Jón er blessunarlega laus við fordóma í garð fólks af öðrum kynþætti eða þjóðerni og það síðasta sem hann myndi gera væri að kynda undir kynþáttaofsóknum."