Ekki hafa komið upp nein vandræði við ferðir Herjólfs, eftir að siglingar hófust að nýju til Landeyjahafnar í gærmorgun. Dýpkunarskipið Perlan er á leið til Reykjavíkur til viðgerðar.

Eftir tæplega hálfsmánaðarhlé hóf Herjólfur að sigla til hinnar nýju Landeyjahafnar þegar búið var að grafa frá haft sem lokaði innsiglingunni. Til stóð að dýpka meira en það frestast í einhverja daga vegna bilunar í dýpkunarskipinu.

„Þetta hefur gengið eins og í sögu, eftir að búið var að hreinsa út,“ segir Sigmar Jónsson, hafnarvörður í Landeyjahöfn. Skipið sigldi samkvæmt áætlun í gær og í morgun án þess að nokkur vandkvæði kæmu upp.

Nokkuð dró úr flutningum þegar skipið sigldi til Þorlákshafnar, margir hættu við þegar þurfti að fara þá leið. Segir Sigmar að umferðin sé að færast í eðlilegt horf.

Sigurður Áss Grétarsson, forstöðumaður hafnasviðs Siglingastofnunar, segir að ætlunin sé að dýpka meira til þess að eitthvað sé uppá að hlaupa þegar efni fer aftur í það svæði sem búið er að dýpka. Verði það ekki gert megi búast við að sandburðurinn hafi fljótlega áhrif á siglingar Herjólfs. Vegna frátafa Perlu er verið að kanna aðra möguleika.