Olíuverzlun Íslands segir að sú álagning sem FÍB hefur reiknað út sem meðaltals álagningu íslensku olíufélaganna sé verulega ofmetin og ekki í neinu samræmi við tölur úr uppgjörum félagsins 2009 og 2010. 

Olís sendi frá sér yfirlýsingu vegna fréttar í Fréttablaðinu í morgun um álagningu íslensku olíufélaganna.

„Framlegðartölur félagsins eru í samræmi við framlegðartölur í öðrum norrænum ríkjum, sem endurspeglast í því að eldsneytisverð hefur nú um langt skeið verið mun lægra hér á landi en í flestum löndum í kringum okkur.  
Það er torskilið hvað FÍB gengur til með að láta hafa eftir sér upplýsingar sem þessar, en telji FÍB sig vera í aðstöðu til að senda út tilkynningar um álagningu félaga á íslenskum olíumarkaði, þá þarf sú stofnun að vinna slíkar upplýsingar mun betur en gert hefur verið við undirbúning þessarar fréttar.  Þannig virðist FÍB ekki taka tillit til hárra afslátta hér á landi, en þess má til dæmis geta að viðskiptavinum FÍB býðst allt að 6 króna afsláttur á lítra,“ segir í tilkynningu Olíuverzlunar Íslands.