Sveitarfélag kom af fjöllum
Grundartangi. mats.is
Stjórnvöld höfðu ekkert samráð við Hvalfjarðarsveit vegna undirbúningsvinnu við hugsanlega stórverksmiðju á sviði eldsneytisframleiðslu á Grundartanga. Einar Örn Thorlacius, fyrrverandi sveitarstjóri Hvalfjarðarsveitar, harmar þessi vinnubrögð.
Eins og Morgunblaðið greindi frá á laugardag staðfestir Ichiro Fukue, aðstoðarforstjóri Mitsubishi Heavy Industry, móðurfélags Mitsubishi, að undirbúningur að eldsneytisverksmiðju á Grundartanga hafi staðið yfir síðan 2008 og að hann sé nú langt kominn.
Framkvæmdir eru taldar kosta 58 milljarða króna en verksmiðjan á að framleiða DME, lyktarlaust gas sem nota má í staðinn fyrir díselolíu á fiskiskipaflotann.
Létu ekki vita af heræfingu
Því er um stórframkvæmd að ræða og undrast Einar Örn að sveitarfélagið sé fyrst að hafa veður af þessum hugmyndum nú, um tveimur árum eftir að undirbúningsferlið hófst.
„Sem gamall sveitarstjóri er ég þeirrar skoðunar að menn eiga ekki að gleyma að ræða við sveitarfélögin sjálf. Sannleikurinn er líka sá að sveitarfélögin eru komin með heimasíðu og íbúarnir fylgjast þar vel með fréttum úr sveitarfélaginu. Netið er orðin mikilvæg upplýsingasveita hjá sveitarfélögum, sérstaklega smærri sveitarfélögum. Þessar síður eru mikið lesnar.
Í því ljósi er svolítið kjánalegt að lesa um hluti í fjölmiðlum sem væri bæði kurteislegra og skemmtilegra að kynna fyrir íbúunum, að ég tala nú ekki fyrir sveitarstjórnarmönnum fyrst.
Þegar ég var sveitarstjóri Hvalfjarðarsveitar voru skipulagðar heræfingar á vegum Atlantshafsbandalagsins og Landhelgisgæslunnar í Hvalfirði. Þá var ekki einu sinni sent bréf til sveitarstjórnar og hún látin vita af þessu heldur las fólk um þetta í fjölmiðlum.“
Vitnisburður um gæði hafnarinnar
Einar Örn telur áhuga Mitsubishi til marks um hversu góð hafnaraðstaðan við Grundartanga er.
„Það sannast enn einu sinni á áhuga Mitsubishi. Forsvarsmenn fyrirtækisins líta til aðstæðna á Grundartanga sem eru í einu orði sagt frábærar. Aðstaðan við Grundartangahöfn laðar greinilega að fyrirtæki víðsvegar að úr heiminum. Grundartangi státar af nálægð við höfuðborgarsvæðið og frábærri höfn.
Til skamms tíma voru aðeins tvö stóriðjuver á Grundartanga. Nú er hins vegar verið að úthluta lóðum til atvinnufyrirækja svo ekki sé minnst á þetta verkefni sem kann að bætast við. Nú þegar vinna mörg hundruð manns á Grundartanga eða á að giska 600 til 700 manns allan sólarhringinn, allt árið. Það stefnir í að verða mikið meira og það er hið besta mál,“ segir Einar Örn en áætlað er að verksmiðjan skapi 150 til 250 störf.
Einar Örn Thorlacius.
