Snjór hefur sest efst í Esjunni. mbl.is/Kristinn

Það snjóaði efst í Esjunni í nótt og hafi einhver verið í vafa þá er haustið komið. Svalt loft er yfir landinu og víða var næturfrost. „Þetta eru hrein og klár haustmerki,“ segir Einar Sveinbjörnsson veðurfræðingur í samtali við mbl.is.

Einar segir að það hafi verið hægviðrasamt á landinu í gærkvöldi og að rof hafi verið í skýjahulunni. Þá kólni á landinu en á nokkrum stöðum mældist frost í nótt, þó fyrst og fremst á láglendi á Norðausturlandi. 

„Það var frekar svalt loft yfir landinu og frostmarkshæðin hefur verið í 800 til 1000 metra hæð. En lægri norðan- og norðaustanlands. Það var til að mynda frost á Öxnadalsheiðinni í nótt og á fjallvegum á Norðausturlandi. Sumstaðar gerði ofan í þetta smá slydduél, og situr auðvitað í hæstu fjöllum,“ segir Einar.

Einar bendir á að haustin á Íslandi séu oft löng. Það sé oft mun erfiðara að tala um vetrarbyrjun heldur en haustbyrjun. Snjór efst í Esjunni eigi því ekki að koma neinum á óvart eftir 20. september. 

Að sögn Einars verður áfram svalt loft yfir landinu næstu tvo sólarhringa. Síðan tekur að hlýna hægt og rólega. Mildara loft úr suðvestri mun eiga greiðari leið til landsins, eða um næstu helgi. „Það verður mildara í lofti,“ segir Einar.

Þegar komið sé fram yfir jafndægur þá frysti við jörð þegar kvöldin eru stillt og nætur bjartar, burtséð frá hitagæðum loftsins. „Það eru lögmál náttúrunnar,“ segir Einar.