Suðurgata er einstefnugata fyrir akandi umferð til suðurs frá Kirkjugarðsstíg að Skothúsvegi mbl.is/Golli

Engar kvartanir hafa borist frá íbúum Vesturbæjar vegna breytinga sem gerðar voru á Suðurgötunni fyrir skömmu, að sögn Karls Sigurðssonar, formanns umhverfis- og skipulagsráðs Reykjavíkurborgar. Segir hann að götunni hafi m.a. verið breytt í einstefnugötu að beiðni íbúa götunnar en gatan er afar þröng fyrir umferð í báðar áttir.

Karl segir eðlilegt að einhverjir eigi erfitt með að átta sig á breytingunni fyrst um sinn, en nú er Suðurgata einstefnugata fyrir akandi umferð til suðurs frá Kirkjugarðsstíg að Skothúsvegi en tvístefnugata fyrir hjólandi umferð. 

Umferð beint úr hjarta miðborgarinnar

Hann bendir fólki á að þægilegt sé að aka annað hvort um Fríkirkjuveg eða Hofsvallagötu. Þær götur henti mun betur fyrir mikla umferð heldur en smærri götur í nágrenni Suðurgötu, svo sem Tjarnargötu og Ljósvallagötu. Hann segir að með breytingunni sé líka verið að tengja miðborgina við Háskóla Íslands á  sama tíma og umferðinni sé beint frá innsta hring miðborgarinnar.

Á fundi borgarráðs í gær óskaði Kjartan Magnússon, borgarfulltrúi Sjálfstæðisflokksins eftir því að bókað yrði að hann telji ákvörðun um einstefnu á Suðurgötu milli Kirkjugarðsstígs og Skothúsvegar hafi verið misráðin og hvetur umhverfis- og samgönguráð til að endurskoða hana.

„Breytingin hefur nú þegar haft þær óæskilegu afleiðingar í för með sér að umferð, sem áður fór norður Suðurgötu, leitar nú um nærliggjandi íbúagötur, t.d. um Tjarnargötu og Ljósvallagötu," segir í bókun Kjartans.

Hámarkshraði á Suðurgötu er 30 km á klst. og segir Karl að því miður hafi verið allt of algengt að ökumenn hafi virt hraðatakmarkanir að vettugi og ekið á 50 km hraða eða jafnvel allt að 70 km hraða um götuna. Hann segist ekki óttast það að umferðarhraðinn aukist í kjölfar breytingar á götunni. Hann segir að lögreglan á höfuðborgarsvæðinu hafi verið upplýst um breytingarnar og á von á því að eftirlit lögreglu muni aukast á næstunni við Suðurgötu.