Frumvarpið liggi fyrir á haustþingi

„Gangur málsins á næstunni verður sá að nú mun ráðuneytið taka að sér að vinna upp frumvarp eða frumvörp um breytingar á stjórn fiskveiða.

Ætlunin er að því verki verði lokið, þannig að slíkt verði hægt að leggja fyrir Alþingi fyrir jólafrí. Er þá ætlunin að breytingarnar geti orðið að lögum á vorþingi þannig að ný skipan mála taki gildi á fiskveiðiárinu 2011/12,“ sagði Jón Bjarnason, sjávarútvegs- og landbúnaðarráðherra, í ávarpi á aðalfundi Samtaka fiskvinnslustöðva í gær.

Ráðherra vék að þeirri ákvörðun sinni að fela Hafrannsóknastofnun að hefja undirbúning að nýtingarstefnu fyrir þorsk. Hann hyggist „setja á laggirnar samráðsvettvang um nýtingarstefnuna, sem í ættu sæti m.a. fulltrúar stjórnvalda, atvinnugreinarinnar og fiskifræðinga“.