Keppendur í Hjartadagshlaupinu í dag.

Hjartavernd hélt í dag Hjartadagshlaupið í fjórða sinn við Kópavogsvöll. Alls luku tæplega 200 manns hlaupinu en Hjartadagshlaupið er haldið á Alþjóðlega hjartadagin.

Í hlaupinu er boðið upp á tvær vegalengdir 5 og 10 km og var þátttaka í hlaupinu ókeypis eins og verið hefur frá upphafi. Sigurvegarar í 10 km hlaupinu voru Sæmundur Ólafsson sem hljóp á tímanum 40:48 mínútur og Íris Anna Skúladóttir sem lauk hlaupinu á 41:22 mínútu.

Í 5 km hlaupi unnu þau Þorbergur Ingi Jónsson á 18:29 mín og Hrönn Guðmundsdóttir sem hljóp á 21:07 mín.

Hjartadagurinn er haldinn á heimsvísu síðasta sunnudag í september ár hvert en það er Alþjóðahjartasambandið með stuðningi frá Alþjóðaheilbrigðisstofnunni. Markmið Hjartadagsins, sem yfir 100 þjóðir taka þátt í um allan heim, er að auka vitund og þekkingu almennings á ógnum hjarta- og æðasjúkdóma og leggja áherslu á heilbrigða lífshætti svo að börn, unglingar og fullorðnir um allan heim öðlist betra og lengra líf.

Að sögn Hjartaverndar látast rúmlega 17,1 milljón karla og kvenna af völdum hjarta- og æðasjúkdóma eða ein manneskja á 2 sekúndna fresti.  Á Íslandi deyja um 700 manns árlega vegna sjúkdóma í blóðrásarkerfi.