Frá höfuðstöðvum sambandsins í Brussel. Reuters

Wolfgang Schäuble, fjármálaráðherra Þýskalands, hefur lýst yfir stuðningi við tillögur að hertum viðurlögum við hallarekstri aðildarríkja sem fela munu í sér fésektir af hálfu sambandsins. Þá er ráðherrann fylgjandi því að styrkir til landbúnaðar og þróunarmála verði skilyrtir frekar.

Breska viðskiptablaðið Financial Times gerir málinu skil en Schäuble lýsti yfir þessari skoðun sinni í bréfi til fjármálaráðherra hinna aðildarríkjanna 26. fyrir helgi.

Segir þar að ráðherrann sé einnig fylgjandi því að fella niður styrki á sviði landbúnaðar og þróunarmála ef upp komist um óstjórn og sóun fé sem ætlað sé til uppbyggingar. Verður þetta að teljast orðsending til Búlgara en þar hefur milljörðum króna af styrkfé sambandsins verið beint til velunnara stjórnvalda, í stað þess að renna til uppbyggingar landsins.

Þá feli tillögurnar í sér að ríkjum sem ógni stöðugleika í Evrópusambandinu, einkanlega á evrusvæðinu, refsað fyrir fjárlagahalla með því að missa atkvæðarétt í ráðherraráði sambandsins.

Umdeildar tillögur

Fram kemur á vef Financial Times að líklegt sé að hart verði tekist á um tillögurnar á fundi Van Rompuy, forseta Evrópusambandsins, með vinnuhópi um viðbrögð við efnahagskreppunni í dag.

Þjóðverjar fari fyrir hópi ríkja, á borð við Holland og Bretland, sem vilji refsa aðildarríkjum sem ekki fylgja aga í fjárlagagerð, hugmyndir sem Frakkar, Ítalir og Belgar leggist gegn.

Financial Times segir að samkvæmt tillögunum muni ríki sem búa við þjóðarskuldir sem nema yfir 60% af þjóðarframleiðslu þurfa að lækka skuldirnar um 5% á þriggja ára tímabili ellegar eiga á hættu að verða beitt fésektum.

Til samanburðar sé því spáð að skuldir franska ríkisins fari í 83% af þjóðarframleiðslu Frakklands í ár sem þýði að ríkið myndi þurfa að lækka höfuðstól skuldanna um 4%. Sambærileg tala fyrir Ítalíu sé 116% og 8% lækkun skulda.

Slíkur niðurskurður yrði ekki sársaukalaus enda myndi hann kalla á verulegan samdrátt í ríkisútgjöldum með tilheyrandi hliðaráhrifum.