Caracas, höfuðborg Venesúela.

Icelandair er með leiguflug í Venesúela og var Ellert Ellertsson flugvirki sendur þangað vegna þessa verkefnis. Starfsmenn Icelandair eru vanalega sóttir á flugvöllinn, en þegar maðurinn lenti var enginn til að sækja hann. Hann hringdi þá til að forvitnast um farið, en í þá kom upp að honum maður sem sagðist vera bílstjórinn hans. Eftir að hafa ráðfært sig við tengilið hjá Santa Barbara-flugfélaginu í síma, héldu þeir af stað.

Ellert Ellertsson segir í samtali við RÚV, að tengiliður hans hjá Santa Barbara-flugfélaginu hafi fengið  bakþanka og hringt aftur og m.a. fengið að ræða við einn mannræningjanna. Ellert segir að hann hafi fengið símann aftur í sínar hendur, þá hafi tengiliðurinn ráðlagt honum að yfirgefa ekki flugvöllinn – en það hafi verið um seinan.

Ökumaður og tveir félagar hans voru í bílnum, auk Ellerts, og tóku af honum símann. Stefnan var tekin í átt að miðborg Caracas, en ökuferðin varð á endanum heldur styttri en mannræningjarnir höfðu vonast til, því bíllinn festist í umferðarteppu vegna skriðu sem hafði fallið á veginn. Ellert segir að þá hafi hann ákveðið að yfirgefa bílinn, hafi rifið upp hurðina og heimtað farangurinn sinn og símann. Mannræningjarnir hafi ekki ætlað að gefa sig, þannig að hann þurfti sjálfur að teygja sig inn í bíl og opna skottið.

Ellert kom sér sjálfur á hótelið með leigubíl, en þá hafði lögreglunni verið gert viðvart. Talið er að hátt í níu þúsund manns sé rænt á ári hverju í Venesúela og margir þeirra skila sér ekki til baka heilir á húfi.