Eldgosið hefur haft áhrif á efnainnihald heyja sem bændur öfluðu á öskusvæðinu. Kristinn Ingvarsson

Þriðjungur heysýna sem tekin voru á bæjum undir Eyjafjöllum mældust með of hátt járninnihald. Járn í fóðri hefur meðal annars áhrif á upptöku kopars  og sinks og getur of mikið járn í fóðri kallað fram skort á þessum efnum. Þá getur mikið járn einnig leitt til eitrunar.

Í júní voru nokkrir bæir á áhrifasvæði eldgossins heimsóttir og tekin gróðursýni til steinefnamælinga. Í byrjun september var svo farið á flesta þessa bæi aftur og verkuð heysýni tekin til að skoða hvernig til hefði tekist við heyöflun m.t.t. öskumengunar. Tekin voru 1-5 verkuð heysýni frá hverjum bæ og þeim blandað saman í eitt safnsýni en athugunin gekk út á að taka sýni sem myndu lýsa heildar heyforða búsins sem nota á til að fóðra skepnur nú í vetur.
 

Niðurstöður leiddu í ljós eðlileg gildi flestra steinefna að frátöldum háum járngildum. Styrkur járns ræðst mest af jarðvegsmengun og í þessu tilfelli öskumagni í gróðri. Járn í fóðri hefur meðal annars áhrif á upptöku kopars (Cu) og sinks (Zn) og getur of mikið járn í fóðri kallað fram skort á þessum efnum. Þá getur mikið járn einnig leitt til eitrunar og hafa eitrunarmörkin verið sett við 1.000 mg/kg. Eitt sýnið greindist með 2059 mg/kg.

Á vef Búnaðarsambands Suðurlands segir að eðlilegt sé að bændur reyni eftir því sem aðstæður leyfa að gefa ómengað gróffóður með öskumenguðu fóðri. Jafnframt er æskilegt að annað fóður s.s. kjarnfóður og steinefnablöndur, sé valið m.t.t. járninnihalds og annarra snefilefna.