Segir að Glitnir sé að höfða tvö mál vegna sömu sakargifta
Jón Sigurðsson, Jón Ásgeir Jóhannesson og Pálmi Haraldsson. Golli / Kjartan Þorbjörnsson
Pálmi Haraldsson telur að slitastjórn Glitnis hafi höfðað tvö mál gegn sér vegna sömu sakargifta. Þetta kemur fram í greinargerð sem hann hefur sent frá sér vegna dómsmála slitastjórnar gegn honum. Í henni hafnar Pálmi því að hafa haft þau áhrif á stjórn Glitnis sem haldið er fram í kærunni.
Slitastjórn Glitnis hefur höfðað mál gegn Pálma og fimm öðrum fyrir Héraðsdómi Reykjavíkur vegna meintra brota sem tengjast m.a. félögunum Aurum, Jötni Holding ehf., Fons og fleiri félögum. Jafnframt hefur Glitnir höfðað mál gegn Pálma og fleirum fyrir rétti í New York.
„Útilokað er að líta með öðrum hætti á málið en þau viðskipti sem mál þetta er sprottið af sé hluti af málinu í Bandaríkjunum. Pálmi gerir alvarlega athugasemd við að stefnandi hafi höfðað gegn honum tvö bótamál vegna sömu viðskiptanna,“ segir í greinargerð lögmanns Pálma.
Pálmi segist aldrei hafa gegnt formlegri stöðu hjá Glitni, hvorki sem stjórnarmaður eða starfsmaður. Öll viðskipti fyrirtækja, sem hann hafi verið í fyrirsvari fyrir, við bankann hafi verið armslengdar viðskipti. Hafa verði í huga við yfirferð yfir gögn málsins, að í viðskiptum sínum og félaga sem hann hafi stjórnað hafi Pálmi ekki haft neina skyldu til að gæta sérstaklega að hagsmunum Glitnis.
Í kærunni er staðhæft að Jón Ásgeir Jóhannesson og Pálmi hafi farið með yfirráð yfir meira en 50% hlutafjár í FL Group hf. og yfir a.m.k. 40% af hlutafé í Glitni, frá því snemma á árinu 2008. Pálmi mótmælir því að vera samsamaður Jóni Ásgeiri með þessum hætti. Hið rétta sé að Pálmi hafi ekki verið hluthafi í Glitni. Hið sama sé að segja um Fons. Stjórnarseta Sigurðar G. Guðjónssonar í Glitni verði því ekki útskýrð þannig að hann hafi verið fulltrúi Fons í stjórn Glitnis og skiptir engu máli í því sambandi þótt hann hafi gerst formaður í stjórn Fons seint á árinu 2009. Pálmi fullyrðir að hvorki hann né Fons hafi átt einhvern fulltrúa í stjórn Glitnis.
Pálmi leggur áherslu á að málshöfðunin í New York hefur nú þegar valdið honum gríðarlegu tjóni, bæði í fjárútlátum og með því að mannorð hans og viðskiptatraust hefur verið eyðilagt. Pálmi áskilur sér rétt til að krefja þá, sem bera ábyrgð á „þessari dæmalausu málshöfðun“, um skaðabætur vegna þessa.
|
Greinargerð Pálma |
