Lögreglan á Selfossi mun óska eftir framlengingu gæsluvarðhalds yfir karlmanni á þrítugsaldri sem réðst á unga konu í Hveragerði fyrir viku.  Gæsluvarðhald yfir manninum rennur út í dag. Maðurinn var handtekinn við Rauðavatn er hann var á leið til Reykjavíkur eftir að hafa barið konuna með barefli. 

Um kl. tíu á mánudagsmorgun var lögregla kölluð að íbúðarhúsi í Hveragerði vegna manns sem hafði brotið sér leið inn og ráðist á konu.  Maðurinn hvarf af vettvangi í bifreið sem hann ók en var handtekinn við Rauðavatn af lögreglumönnum á höfuðborgarsvæðinu.  Maðurinn var færður í fangageymslu á Selfossi. 

Konan var flutt á slysadeild Landspítala þar sem gert var að áverkum hennar sem voru einkum á höfði.  Réttarmeinafræðingur var fenginn til að meta áverkana og taldi að þeir hefðu hlotist af barefli.  Maðurinn og konan þekkjast en ekki liggur fyrir um aðdraganda árásarinnar og er sá þáttur  meðal annars til rannsóknar. 

Konan er ekki með alvarlega áverka en með tilliti til þess að maðurinn beitti vopni er verknaðurinn alvarlegur, samkvæmt upplýsingum frá lögreglunni á Selfossi í síðustu viku. 

Maðurinn var með í fórum sínum lítilræði af amfetamíni auk þess var hann ekki með ökuréttindi og grunaður um akstur undir áhrifum fíkniefna.