„Þetta eru virkilega erfiðir og sárir tímar,“ segir Halldóra J. Þorvarðardóttir, prófastur í Landsveit, um stöðuna í íslensku samfélagi um þessar mundir.
Hún segist skilja reiði og áhyggjur fólksins og mótmæli séu birtingarform ríkjandi ástands. Þau eigi sinn skilning en ofbeldi eigi aldrei rétt á sér.
Halldóra predikaði í Dómkirkjunni fyrir þingsetningu sl. föstudag og á leiðinni inn í Alþingishúsið fékk hún egg í höfuðið og blæddi örlítið úr hægra eyra hennar. Í samtali í Morgunblaðinu í dag segist hún hafa verið viðbúin öllu og kveinki sér ekki undan högginu. Eftir standi sú reynsla að hafa tekið þátt í þessum atburði og verið í hringiðunni.