Magnús Orri Schram, þingmaður Samfylkingarinnar, óskaði eftir samstarfi þingmanna úr öllum flokkum á Alþingi í dag um að búnir verði til skattalegir hvatar s.s. skattaafslættir til að koma atvinnulífinu í gang.

Þetta kom fram við utandagskrárumræður um skattastefnu ríkisstjórnarinnar. Magnús Orri sagði að beita mætti skattalegum hvötum sem nýtist fyrirtækjum, ýti undir fjárfestingar þeirra sem geri þeim kleift að gera ráð fyrir skattalegu hagræði.

Beindi hann því til þingheims að taka höndum saman um slíkar aðgerðir í skattamálum í einhverjum af nefndum þingsins.

„Væri t.d. hægt að opna fyrir skattaafslátt á árinu 2011 eða 2012 ef fyrirtæki ráðast í nýráðningar á þessu ári? Einn aðili sem fer út af atvinnuleysisskrá sparar ríkinu 150 þúsund krónur á mánuði og sú upphæð gefur mjög gott rými til að gefa afslátt af launatengndum gjöldum, vegna nýráðninga, til dæmis í gegnum tryggingagjald.

Það mætti ganga lengra og ímynda sér að fyrirtæki geti ráðist í annars konar fjárfestingar og fái til þess skattalegt hagræði. Lykilatriðið er að við eigum að nýta skattastefnuna til að hjálpa atvinnulífinu í gang á nýjan leik og ég vil óska eftir samstarfi þingmanna úr öllum flokkum um hvernig hægt er að framkvæma hugmyndir sem þessar. Það getum við gert á vettvangi þingnefnda,“ sagði Magnús Orri.