Hæstiréttur. mbl.is/GSH

Hæstiréttur hefur þyngt refsingu yfir 42 ára gömlum karlmanni sem sakfelldur var fyrir húsbrot og rán. Hann ruddist ásamt öðrum manni inn á heimili í Reykjanesbæ og misþyrmdi þar húsráðanda. Mennirnir höfðu síðan á brott með sér fartölvu og sögðu það greiðslu upp í skuld við stúlku út í bæ.

Maðurinn var dæmdur í tólf mánaða fangelsi en í héraði tíu mánaða. Hinn maðurinn var dæmdur í 12 mánaða fangelsi í héraði og áfrýjaði ekki.

Þetta gerðist í febrúar á síðasta ári. Mennirnir tveir sögðust hvorugir hafa verið að verki og annar þeirra sagðist raunar hafa flutt til Noregs daginn eftir og hefði verið að undirbúa flutninginn þennan dag.

Héraðsdómur taldi sannað, með framburði brotaþolans, annarra vitna og áverkavottorði, að mennirnir tveir hefðu verið að verki og gerst sekir um húsbrot og rán. Segir dómurinn, að mennirnir hafi ruðst í sameiningu inn á heimili mannsins og brotið þannig freklega gegn friðhelgi heimilis hans. Þá hafi þeir beitt manninn ofbeldi og eigi sér engar málsbætur.

Hæstiréttur féllst á rökstuðning héraðsdóms en leit einnig til þess við þyngingu refsingar að maðurinn framdi brotið í félagi við annan mann og að brotið var til þess fallið að vekja ótta hjá fórnarlambinu. Einnig að af gögnum málsins mátti sjá að brotavilji hafi verið einbeittur.