Akureyri. mbl.is/Sigurður Bogi

Lögreglan á Akureyri fékk á þriðja tímanum í nótt tilkynningu frá íbúa í Glerárhverfi í nágrenni stíflunnar yfir Glerá um að hann hefði heyrt þrjá skothvelli sem honum virtist vera ekki langt frá. Síðar komu tilkynningar frá fleirum í næsta nágrenni sem töldu sig einnig hafa heyrt skothvelli.

Lögreglumenn fóru þegar á svæðið og heyrðu þá tvo skothvelli sem virtust ekki vera langt í burtu. Lögreglumenn frá Akureyri og sérsveit ríkislögreglustjóra leituðu svæðið til morguns en urðu einskis varir. Að sögn lögreglu var þoka og lítið skyggni og gerði það leit erfiðari.

Í morgun tilkynnti íbúi í Klettaborg, sem er nýlegt hverfi sunnan við Glerá,  um að farið hefði verið inn í íbúðina í nótt á meðan íbúar voru í fastasvefni og stolið þaðan fartölvu, myndavél og tveimur haglabyssum sem voru geymdar í byssuskáp í bílskúr.

Lögreglan segir, að lykillinn að byssuskápnum hafi verið geymdur í íbúðinni og höfðu þjófarnir notað hann til að opna byssuskápinn. Þá tóku þeir talsvert magn af skotfærum sem einnig voru geymd í skápnum.

Segir lögreglan líklegt, að þarna sé komin skýringin á skothvellunum í nótt.

Einnig var farið inn í nokkra opna bíla í nágrenninu og rótað í þeim. Biður lögreglan á Akureyri alla þá sem urðu varir við grunsamlegar mannaferðir frá miðnætti til kl. 3 í nótt að láta  lögregluna vita í síma 4647700.