Meðfylgjandi ljósmynd af silfurreyninum við Aðalstræti var tekin þann 26. maí sl. á 125 ára afmælisdegi Garðyrkjufélags Íslands Ljósmynd Stefán Sæmundsson.

Á mánudag munu Guðrún Pálsdóttir bæjarstjóri Kópavogs, Guðríður Arnardóttir formaður bæjarráðs og Vilhjálmur Lúðvíksson formaður Garðyrkjufélags Íslands gróðursetja  vefjaræktað eintak af silfurreyninum í Fógetagarðinum við Aðalstræti.

Það tré er talið elsta innflutta tré landsins sem enn lifir og markar tímamót í sögu garðræktar á Íslandi. Trénu var valin staður við tjörnina í Kópavogslæk neðan Fífuhvamms.
 
Silfurreynirinn við Aðalstræti var upprunalega gróðursettur árið 1884 af Hans Georg Schierbeck, þáverandi landlækni, sem hafði forgöngu um stofnun Garðyrkjufélagsins (Hins íslenska garðyrkjufélags) árið 1885. Tréð hefur staðið af sér óblíð veður og umhverfisálag við Aðalstræti í langan tíma og virðist sérlega öflugur einstaklingur.

Þuríði Yngvadóttur hjá Skógræktarfélagi Reykjavíkur tókst fyrir um tólf árum að fjölga þessu tré með vefjaræktun (þ.e. klóna tréð) og tryggja þannig tilvist nákvæmlega sama erfðaefnis í nýjum einstaklingum. Plönturnar voru síðan framræktaðar af Ólafi S. Njálssyni í Garðplöntustöðinni Nátthaga.

Eintakið sem verður gróðursett er yfir 3,5 m á hæð og er lifandi minnismerki um það starf sem hófst um það leyti sem Garðyrkjufélagið var stofnað. Garðyrkjufélag Íslands hefur hug á að færa fleiri sveitarfélögum á landinu samskonar minnisvarð, segir í fréttatilkynningu.

Önnur vefjaræktuð tré af sama silfurreyni hafa nú þegar verið  gróðursett í Hveragerði og Seltjarnarnesi, nú þegar hafa Akureyrarkaupstaður og sveitarfélagið Árborg samþykkt að þiggja samskonar tré að gjöf frá Garðyrkjufélaginu.