Séra Skúli S. Ólafsson. mbl.is

„Hér virðast vera fleiri fórnarlömb en leiðtogar - hvað þá skapandi leiðtogar,“ sagði séra Skúli S. Ólafsson, prestur í Keflavíkurkirkju, í sunnudagspredikun sinni, sem var útvarpað beint á Rás 1. Skúli fjallaði um fátækt í predikun sinni og þann vanda sem Suðurnesjamenn standa frammi fyrir í atvinnumálum.

Hann minntist á að nú sé Evrópuár gegn fátækt og félagslegri einangrun.

„Nú er ár fátæktar á Íslandi - nú eru ár fátæktar. Hið þriðja hófst nú fyrr í þessum mánuði þegar tvö ár voru liðin frá hruninu,“ sagði hann.

„Hér á Suðurnesjunum standa túrbínurnar innpakkaðar í skemmum og skapa ekki önnur verðmæti en vaxtagreiðslurnar sem renna að endingu úr landi. Verra er það með orkulindirnar sem brjóstum okkar búa, ef ekki rofar senn til. Það fer meira fyrir þolendum en gerendum nú á þessum tímum. Hér virðast vera fleiri fórnarlömb en leiðtogar - hvað þá skapandi leiðtogar. Hvað eigum við að gera, spyrjum við líka,“ sagði Skúli.

Hann segir að enginn af holdi og blóði geti þagað, þegar hann horfir upp á það ástand sem hér sé. Í atvinnulífi, í velferðarmálum, í málefnum sjúklinga, aldraðra og deyjandi. „Sætir það virkilega furðu þótt menn rísi upp og hvetji til þess í Jesú nafni að gripið sé til aðgerða,“ sagði Skúli.

„Verið eins og Galíleuvatn. Ekki vera Dauðahafið. Hér eru vissulega engar einfaldar lausnir en það á ekki að hamla okkur, því við erum ekki einfaldar sálir. Við erum skapandi einstaklingar sem eigum að starfa og hugsa, eins og leiðtogar. Eða með öðrum orðum, fólk sem vill láta gott af sér leiða,“ sagði hann.

Skúli segir að íslensk stjórnmál séu gegnsýrð af þeirri hugsun að áhrifin snúist öll um takmörkuð völd fremur en þjónustuna sem eigi sér engin takmörk.

„Þeir sem eiga mikið eiga að hugsa til himna, ekki í Þórðargleði yfir óförum annarra , sem eru einkenni lítilmenna. Heldur í umhyggju og kærleika þess sem veit og skilur að það er sælla að gefa en þiggja,“ sagði hann og vísaði til orða Jóhannesar skírara.