Álverið á Grundartanga Árni Sæberg

Smávægilegar rafmagnstruflanir urðu á flutningi raforku í nótt þegar útleysingar urðu hjá Norðuráli á Grundartanga vegna bilunar í háspennubúnaði. Skammhlaupið varð um klukkan 5 í morgun með þeim afleiðingum að 300 megavött stöðvuðust í álverinu. Við þetta kom högg á landskerfið, en að sögn Guðmundar Inga Ásmundssonar, aðstoðarforstjóra Landsnets, var höggið mun minna en þegar bilanir urðu í byrjun september.

„Þetta var ekkert eins og verið hefur, mun umfangsminna því það urðu engar keðjuútleysingar. Það skiptir nú mestu," segir Guðmundur. Hann segir að það megi að hluta til þakka ráðstöfunum sem gerðar voru við síðustu bilanir, en einnig því að höggið sem nú kom á kerfið var talsvert minna.

„Virkjanirnar brugðust við og hjá Alcoa Fjarðaráli var dregið úr álagi sem viðbrögð við þessu, en að öðru leyti hef ég ekki heyrt að neinar afleiðingar hafi orðið af þessu, þetta varð ekkert langvarandi," segir Guðmundur. Samkvæmt Landsneti fór tíðni raforkukerfisins yfir 52 Hz við útleysinguna. Mikill óróleiki kom á raforkukerfið og urðu einhverjir notendur á Norðurlandi straumlausir um stundarsakir.