Þingmenn Framsóknarflokksins mbl.is/Kristinn Ingvarsson

Ungir framsóknarmenn í Vestur-Skaftafellssýslu vilja að hér verði stofnuð þjóðstjórn og mótmæla harðlega, í ályktun sem þeir hafa sent frá sér, niðurskurði í heilbirgðiskerfinu.

„Félag ungra framsóknarmanna í V-Skaftafellssýslu mótmælir harðlega þeim niðurskurði í heilbrigðiskerfinu sem fyrirhugaður er í fyrirliggjandi fjárlagafrumvarpi. Niðurskurðurinn gerir ráð fyrir ótrúlega ósanngjörnum niðurskurði í heilbrigðisþjónustu á landsbyggðinni.

Landsbyggðin naut góðærisins ekki á sama hátt og höfuðborgarsvæðið og því er óskiljanlegt að niðurskurðarhnífnum eigi að beita jafn gróflega gegn landsbyggðinni og gert er ráð í fjárlagafrumvarpinu.“  

Félag ungra framsóknarmanna í V-Skaftafellssýslu leggur til að mynduð verði þjóðstjórn á Íslandi. Núverandi ríkisstjórn hefur sýnt það í verki að hún veldur ekki þeim verkefnum sem þarf að vinna. FUF í V-Skaftafellssýslu telur að nú sé tími til kominn að alþingismenn vinni saman, m.a. að forgangsverkefnum eins og málefnum heimilanna, að koma atvinnulífinu af stað og að endurskoða fyrirliggjandi fjárlög.“