mbl.is/Ómar

Stjórn Hollvina Ríkisútvarpsins harmar að enn skuli ráðgert að skera niður rekstrarfé Ríkisútvarpsins, í fjórða sinn á skömmum tíma. Ætlunin er að hækka svonefnt útvarpsgjald um fjögur prósent en lækka samt sem áður framlag ríkisins til Ríkisútvarpsins. Þetta kemur fram í ályktun frá stjórninni

„Samkvæmt lögum um Ríkisútvarpið ohf. frá 2007 átti útvarpsgjaldið að vera kr. 14.580 á hvern gjaldanda en var með lögum nr. 174 29. des 2008 hækkað í kr. 17.200.

Með sömu lögum var bætt inn málsliðnum: „Gjaldið rennur í ríkissjóð“, sem gerði löglegan næsta leik, þann að skerða framlag ríkisins til RÚV þrátt fyrir hækkun útvarpsgjaldsins.

Árið 2009 nam heildarfjárveitingin til Ríkisútvarpsins 3.575 milljörðum króna, er 3.218 milljarðar í ár en samkvæmt fjárlagafrumvarpinu verður fjárveiting næsta árs 2.980 milljarðar króna og síðan óbreytt til 2014. Þetta er rúmlega hálfs milljarðs króna skerðing á tveimur árum.

Í ályktun stjórnar Hollvina Ríkisútvarpsins í janúar á þessu ári var varað við afleiðingum þess gríðarlega niðurskurðar sem þá hafði dunið á stofnuninni og bent á að vegna þess hefðu um 50 starfsmenn RÚV þá þegar misst vinnuna, þar á meðal nokkrir af elstu og reyndustu starfsmönnum Ríkisútvarpsins. Erfitt er að sjá hvernig brugðist verður við þessum fjórða niðurskurði á stuttum tíma öðruvísi en með enn frekari uppsögnum – og ef til vill stórlega styttri dagskrá og enn frekari endurflutningi gamals efnis, sem er nú þegar mjög áberandi í dagskránni.

Ekki verður annað séð en að með þessu framhaldi verði Ríkisútvarpinu gert ókleift að sinna lögbundnu hlutverki sínu á allra næstu árum.  Í janúar á þessu ári lagði starfshópur mennta- og menningarmálaráðherra fram tillögur um framtíð Ríkisútvarpsins. Þar er lögð mikil áhersla á nauðsyn þess að fjárhagslegt sjálfstæði þess verði tryggt og fjárframlög til þess séu í samræmi við mikilvægi almannaútvarps.

Hollvinir Ríkisútvarpsins vöruðu margsinnis við afleiðingum þess að stofnunin yrði gerð að hlutafélagi og undir það tekur fyrrnefndur starfshópur í tillögum sínum og bendir m.a. á að með núverandi fyrirkomulagi sé Ríkisútvarpið í raun á fjárlögum. Í tillögum starfshópsins er lögð áhersla á að framlög til Ríkisútvarpsins séu í samræmi við mikilvægi almannaútvarps og sé þrengt að slíkum fjölmiðli ógni það stöðu hans og hlutverki.

Bent er á að nú um stundir eigi margir miðlar í erfiðleikum og sjaldan eða aldrei hafi verið mikilvægara að tryggja Ríkisútvarpinu góðan aðbúnað, tilgangurinn með almannaútvarpi sé fyrst og fremst menningarlegur og lýðræðislegur auk hins mikilvæga öryggishlutverks og mikilvægt sé að sú sérstaða komi einnig fram í dagskrá og starfsemi Sjónvarpsins og í netmiðlinum ruv.is. Þetta var í tíma talað fyrir rúmum átta mánuðum og er það ekki síður nú. En tillögur starfshópsins virðast hafa verið læstar niðri í skúffu og í engu virtar. Nú þegar tvö ár eru liðin frá efnahagshruninu virðist því miður margt ætla að fara á annan veg en ýmsir vonuðu þegar núverandi ríkisstjórn tók við völdunum og hóf uppbyggingarstarf sitt.

Margir óttast að sú vinstristjórn sem nú situr muni endurtaka þau mistök sem gerð voru í Finnlandi eftir efnahagshrunið þar, að skera umsvif ríkisins niður við trog með þeim afleiðingum að hætta er á að fjöldi manns læsist í fátækragildru. Og það er hörmulegt til þess að vita að það skuli koma í hlut fyrstu hreinu vinstristjórnarinnar sem kemst til valda á Íslandi að draga svo máttinn úr Ríkisútvarpinu að það hætti að standa undir þeim kröfum sem við gerum til almannaútvarps. Hætt er við að slík öfugþróun leiði til þess að ekki verði lengur almennur vilji til að almannaútvarp verði rekið á Íslandi og það leiði að lokum til einkavæðingar, sem ýmsir töldu að hefði einmitt verið ætlun þeirrar hægristjórnar sem hér var við völd áður og fékk samþykkt þau stórvarasömu lög sem gerðu Ríkisútvarpið að „opinberu hlutafélagi“," segir í ályktun.