Skemmtilegt í Stokkhólmi

Þrír ungir Íslendingar voru í sviðsljósinu í handriðakeppninni Frontline Railjam 2010, sem fram fór í miðborg Stokkhólms um helgina. Eiríkur Helgason sigraði í samanlögðu, Halldór Helgason, bróðir hans, var með bestu kúnstirnar eða trikkin í annarri handriðakeppninni og Guðlaugur Guðmundsson í hinni.

Tóku öll verðlaunin

„Þetta er með stærri alþjóðlegu mótunum á snjóbrettum í Evrópu ár hvert, þrenn verðlaun í boði og við tókum þau öll,“ segir Guðlaugur, sem er 24 ára. Eiríkur er ári yngri og Halldór 19 ára en allir eru þeir atvinnumenn á snjóbrettum. Um 30 keppendur tóku þátt í mótinu og fylgdist fjöldi manns með keppendum sýna listir sínar. Þremenningarnir eru frá Akureyri og hafa leikið sér á brettum í áratug. Þeir hafa vakið heimsathygli og er skemmst að minnast sigurs Halldórs í svonefndri „Big Air“-keppni á árlegu vetraríþróttahátíðinni Winter X-Games í Aspen í Bandaríkjunum í byrjun ársins. Um er að ræða fjölmennasta jaðaríþróttamót heims í vetraríþróttum. Þeir hafa áður unnið til verðlauna í Stokkhólmskeppninni, en á meðal keppenda þar eru meðal annars strákar frá Bandaríkjunum og Kanada auk Evrópu.