Íbúðalánasjóður

Íbúðalánasjóður á í dag 892 íbúðir sem hann hefur eignast vegna þess að lántakendur hafa ekki getað staðið í skilum. Íbúðunum hefur fjölgað hratt síðustu mánuðum en um mitt ár 2009 átti sjóðurinn um 250 íbúðir.

Um 220 af þessum íbúðum sem Íbúðalánasjóður á eru í útleigu. Leigjendur eru fyrrum eigendur eða fólk sem var með íbúðirnar í leigu þegar sjóðurinn eignaðist fasteignirnar.

Forsætisráðuneytið sendi í dag frá sér fréttatilkynningu um það sem ríkisstjórnin vinnur að í sambandi við skuldavanda heimilanna. Þar kemur fram að ákveðið hafi verið að leggja fram fjögur frumvörp fram á Alþingi.

1. Frumvarp til laga um að lögbundinn tímafrestur til handa skuldurum til að óska eftir frestun á nauðungaruppboði verði framlengdur til 31. mars 2011.
2. Frumvarp til laga sem veiti skuldurum skjól gegn innheimtu og uppboðum um leið og þeir óska eftir aðstoð og skuldaaðlögun hjá umboðsmanni skuldara.
3. Frumvarp til laga um styttingu á fyrningarfresti krafna í kjölfar gjaldþrots niður í tvö ár að jafnaði.
4. Frumvarp til laga um heimila Íbúðalánasjóði að bjóða til leigu íbúðir sem sjóðurinn hefur keypt á uppboði þannig að tilteknir húsaleigusamningar verði með kauprétti.

Jafnframt er unnið að endurskoðun og einföldun reglna um greiðsluaðlögun hjá umboðsmanni skuldara sem og reglna um sértæka skuldaaðlögun hjá bönkum og lánastofnunum með það markmiði að ryðja burt hindrunum og einfalda og flýta málsmeðferð. Er gert ráð fyrir að þær endurbætur krefjist lagabreytinga í einhverjum tilvikum m.a. að því er varðar reglur um ábyrgð þriðja manns og reglur um lánsveð. Verða þær breytingar og lagfæringar kynntar á næstu vikum.

Ríkisstjórnin stefnir að því að taka til afgreiðslu næstkomandi föstudag frumvarp til laga um endurreikning ólögmætra gengistryggðra lána til samræmis við dóm Hæstaréttar. Mun endurreikningur samkvæmt lögunum rétta af fjárhagsstöðu fjölda einstaklinga og heimila.