Þingmenn Hreyfingarinnar. mbl.is/Ómar Óskarsson

 Þingmenn Hreyfingarinnar telja nýtt frumvarp ríkisstjórnarinnar um breytingar á lögum um gjaldþrotaskipti meingallað. Segja þeir það í raun ónýtt þar sem það mun ekki ná tilgangi sínum, sem á að vera að koma gjaldþrota fólki í skjól frá endurupptöku krafna eftir tvö ár.

„Þinghópur Hreyfingarinnar hefur fengið til umsagnar frumvarp ríkisstjórnarinnar til breytingar á lögum um gjaldþrotaskipti (fyrningarfrestur krafna).  Frumvarpið eins og það liggur fyrir er meingallað og í raun ónýtt þar sem það mun ekki ná tilgangi sínum, sem á að vera að koma gjaldþrota fólki í skjól frá endurupptöku krafna eftir tvö ár.
 
Frumvarpið gerir ráð fyrir að fyrningu megi rifta með dómsúrskurði en í frumvarpinu eru skilyrðin fyrir riftun allt of rúm.  Í 2. málsgrein 1. gr. frumvarpsins segir: „Slíka viðurkenningu skal því aðeins veita með dómi að lánardrottin sýni fram á að hann hafi sérstaka hagsmuni af því að slíta aftur fyrningu, svo og að líkur megi telja á að fullnusta geti fengist á kröfu hans á nýjum fyrningartíma, en að gengnum slíkum dómi gilda almennar reglur um fyrningu.“
 
Þetta þýðir að það er galopið fyrir riftun fyrningar því kröfuhafi hefur alltaf „sérstaka hagsmuni“ af því að slíta fyrningunni og nýtur alltaf góðs af að geta keypt sér meiri tíma með „nýjum fyrningartíma.“
 
Til að ná tilgangi sínum, þurfa lögin að kveða á um með óyggjandi hætti að fólk verði komið í skjól eftir 2 ár og að ekki megi slíta fyrningu nema um saknæma háttsemi hafi verið að ræða.  
 
Þetta frumvarp tryggir því ekki skjól gjaldþrota fólks og þarfnast umtalsverðra breytinga eigi það að ná yfirlýsu markmiði sínu," segir í yfirlýsingu sem þingmennirnir hafa sent frá sér.