„Fólkið auðvitað bara grét“

„Þetta var áfall. Menn voru bara niðurbrotnir. Fólkið auðvitað bara grét, var með áhyggjur og leið rosalega illa,“ segir Júlíana Guðmundsdóttir, trúnaðarmaður hjá Orkuveitu Reykjavíkur, sem er í hópi þeirra sem sagt var upp í gær.

Orkuveitan sagði upp 65 starfsmönnum. Þeim voru tilkynntar uppsagnirnar um hádegisbilið í gær en þær taka gildi um mánaðamótin.

„Við vorum fyrsti hópurinn. Okkur var smalað saman og sagt að okkur væri öllum sagt upp störfum. Einn starfsmaður lá að vísu á sjúkrahúsi, en honum var líka sagt upp. Öðrum, sem er 62 ára gamall og búinn að vinna hjá OR í 37 ár, var þá sagt upp,“ segir Júlíana, sem starfaði á almannatengsla- og umsýslusviði, en nánar er fjallað um uppsagnirnar í Morgunblaðinu í dag.