Biskup Íslands, Karl Sigurbjörnsson. mbl.is/Ómar

Biskup Íslands, Karl Sigurbjörnsson, hefur sent frá sér yfirlýsingu þar sem fram kemur að kynferðisbrot séu ekki liðin í starfi kirkjunnar og kirkjan harmi það þegar slík mál koma upp. Bent er á Fagráðið sem rétta leið umkvartana. Í morgun var greint frá því að fagráði kirkjunnar hafi borist kvartanir um kynferðisbrot þriggja presta í októbermánuði.

„Vegna umræðu í fjölmiðlum um mál sem eru til umfjöllunar hjá Fagráði þjóðkirkjunnar vill biskupsstofa koma eftirfarandi á framfæri:
 
Fagráð um meðferð kynferðisbrota starfar sjálfstætt, án afskipta starfsfólks í söfnuðum eða yfirstjórnar kirkjunnar.
 
Fagráðið var sett á með starfsreglum árið 1998. Markmiðið með setningu ráðsins var að tryggja að einstaklingar sem vilja leggja fram kvörtun vegna kynferðisáreitni eða kynferðisbrots af hálfu starfsmanns Þjóðkirkjunnar hafi farveg fyrir umkvörtun sína. Fagráðið styður meintan þolanda og leiðbeinir um framhald mála. Eitt af markmiðum Þjóðkirkjunnar við setningu starfsreglna um Fagráðið var til að koma í veg fyrir að mál sem varða ætluð kynferðisbrot væru afgreidd í söfnuði eða sóknarnefnd," segir í yfirlýsingu frá biskupi Íslands.