Guðrún Pálsdóttir bæjarstjóri í Kópavogi.

Bæjarstjóri Kópavogs, Guðrún Pálsdóttir, hefur í dag sent formanni Blindrafélagsins, Kristni Halldóri Einarssyni, bréf þar sem áréttað er að lögblindum í bæjarfélaginu gefist kostur á því að nýta sér ferðaþjónustu fatlaðra í samræmi við ákvæði laga um málefni fatlaðra.
 
Í bréfinu er því vísað á bug að erindi Blindrafélagsins hafi í engu verið sinnt af hálfu bæjaryfirvalda þótt ljóst sé að málið hafi ekki verið afgreitt með þeim hætti sem félagið óskaði eftir. Blindrafélagið er að undirbúa málssókn gegn Kópavogsbæ þar sem það telur að bærinn hafi ekki staðið við lögbundnar skyldur sínar gagnvart blindum.

Ósk Blindrafélagsins um að lögblindir fengju ferðaþjónustu umfram annað fólk með fötlun hafi m.a. verið tekin fyrir í bæjarráði fyrr á árinu þar sem henni var hafnað á þeirri forsendu að ekki bæri að mismuna fólki eftir fötlun. Þá átti bæjarstjóri, Guðrún Pálsdóttir, fund með forsvarsmönnum félagsins í sumar þar sem hún upplýsti að endurskoðun á ferðaþjónustu fatlaðra, og útboð þjónustunnar, myndi fara fram samhliða gerð fjárhagsáætlunar fyrir næsta ár.
 
Í lok bréfsins er einnig áréttað að Kópavogsbær leggi hér eftir sem hingað til ríka áherslu á að sinna öllum sínum lögbundnu skyldum.