Blindrafélagið vill betri þjónustu fyrir skjólstæðinga sína. Árni Sæberg

Ferðaþjónusta fatlaðra á vegum Kópavogsbæjar uppfylli ekki markmið 35. greinar laga um málefni fatlaðra frá 1992 og ákvæði 20. greinar í samningi Sameinuðu þjóðanna um réttindi fatlaðs fólks. Þetta segir í yfirlýsingu frá Blindrafélaginu vegna bréfs bæjarstjóra Kópavogs í tengslum við ferðaþjónustu fatlaðra.

Í bréfi sem bæjarstjóri Kópavogs sendi formanni Blindrafélagsins í gær hélt bæjarstjóri uppi málsvörnum fyrir málstað Kópavogsbæjar í deilunni við Blindrafélagið um þau akstursþjónustuúrræði fyrir lögblinda Kópavogsbúa.

Inntakið í bréfinu er að Blindrafélagið sé að fara fram á meiri þjónustu fyrir blinda en öðrum fötluðum stendur til boða og að þau akstursþjónustuúrræði sem Kópavogsbær bíður blindum, sem og öðrum fötluðum sé í samræmi við lög.  Þessu hafi verið svarað og því hafi erindum Blindrafélagsins verið sinnt, þvert á það sem Blindrafélagið heldur fram.

Í yfirlýsingu Blindrafélagsins segir að það sé rétt að félagið sé að fara fram á ferðaþjónustu sem hafi hærra þjónustustig en núverandi ferðaþjónusta fatlaðra býður upp á. „Ástæðan er sú að Blindrafélagið álítur að núverandi  ferðaþjónusta fatlaðra á vegum Kópavogsbæjar uppfylli ekki markmið 35. greinar laga um málefni fatlaðra frá 1992 og ákvæði 20. greinar í samningi Sameinuðu þjóðanna  um réttindi fatlaðs fólks.“

Samkvæmt lögum og mannréttindasamningum á Ferðaþjónusta við fatlaða að uppfylla tilteknar þarfir einstaklinga en ekki einhverja óskilgreinda meðalþörf hópa, segir í yfirlýsingu frá Blindrafélaginu.