Mennirnir huldu andlit sitt er þeir mættu í Héraðsdóm Reykjaness í dag. mbl.is/Kristinn

Mál gegn þremur karlmönnum sem eru ákærðir fyrir að hafa ráðist á og hótað lögreglumönnum í Reykjavík í ágúst í fyrra og fyrir að ráðast á og hóta fjölskyldu í Reykjanesbæ í maí sl., var þingfest í Héraðsdómi Reykjaness síðdegis í dag.

Einn mannanna er ákærður fyrir að hafa veist að tveimur lögreglumönnum sem voru með félaga hans, sem er á meðal hinna ákærðu, í tökum. Sá fyrrnefndi er ákærður fyrir að hafa slegið annan lögreglumanninn í andlitið og hinn í síðuna. Báðir mennirnir eru auk þess sakaðir um hóta   lögreglumönnunum og fjölskyldum þeirra lífláti.

Þá eru tveir þeirra ákærðir fyrir að hafa ráðist á karlmann, eiginkonu hans og dóttur í Reykjanesbæ í maí sl. Varðar málið ætlaða skuld barnabarns hjónanna. Mennirnir eru sakaðir um að hafa hótað að brjótast inn á heimili fólksins. Segir í ákæru að einn þeirra hafi hótað manninum með hnífi. Báðir eru þeir ákærðir fyrir að hafa ráðist á fólkið, sparkað í þau og slegið. Jafnframt fyrir að hafa hótað manninum lífláti.

Verjendur mannanna fengu frest til 18. nóvember til  að fara yfir gögn málsins og taka afstöðu til ákæranna, sem eru fimm. Einnig er um að ræða fíkniefnabrot á hjá einum þeirra og þá er annar ákærður fyrir tilraun til fjárkúgunar og vopnalagabrot.

Tveir mannanna eru þegar byrjaðir að afplána dóm sem þeir hlutu fyrir aðild að innbroti í hús við Barðaströnd á Seltjarnarnesi í maí í fyrra.