Íbúðalánasjóður leitar allra úrræða áður en til nauðungarsölu á íbúðarhúsnæði einstaklinga og fjölskyldna kemur. Ef viðskiptavinir Íbúðalánasjóðs hafa ekki greitt af lánum sínum  í 5 ½ mánuð eða lengur og hafa ekki leitað greiðsluerfiðleikaúrræða óskar Íbúðalánasjóður eftir  nauðungarsölu. Þetta kemur fram í tilkynningu sem sjóðurinn hefur sent frá sér vegna fjölmiðlaumræðu um nauðungarsölur að undanförnu.

Ekki óeðlilegt að ÍLS sé með flestar beiðnir um nauðungarsölu

„Ef fólk hefur samband við Íbúðalánasjóð er nauðungarsölu frestað og leitað allra leiða eins og að gera samning um greiðslu vanskila til að koma í veg fyrir nauðungarsölur.  Frestun á byrjun uppboðs er aldrei synjað ef fólk sækist eftir fresti og er nóg að hafa samband símleiðis.  Í mörgum tilfellum hefur fólk því miður ekki samband.

Einnig er mikilvægt að það komi fram að ÍLS er u.þ.b. með um 50-60%  af fasteignaveðlánum í landinu.  Því er ekki óeðlilegt að sjóðurinn sé beiðandi uppboðsmála í sama hlutfalli.

Enn fremur er vert að benda á að oftar en ekki er ÍLS á 1.veðrétti og þarf því að verja kröfu sína þar, ef síðari veðhafar fara fram á uppboð," segir í tilkynningu.

Hafa reynt að koma í veg fyrir uppboð og boðið upp á skuldbreytingu

Nokkuð hefur verið um að aðrar fjármálastofnanir geri ekki kröfur um uppboð eða mæti ekki til uppboða, þar sem það liggur ljóst fyrir að kröfur þeirra á síðari veðréttum séu utan markaðsverðs íbúða.  Fjármálastofnanir eru þá að afskrifa þær kröfur strax eftir uppboð án þess að koma að uppboðsmálunum sjálfum, þar sem lánveitingar þeirra hafa í raun enga veðstöðu lengur.

Að undanförnu  hefur Íbúðalánasjóður haft samband við uppboðsþola í þeim tilfellum þar sem Íbúðalánasjóður er eini gerðarbeiðandi í þeim tilgangi að koma í veg fyrir yfirvofandi uppboð.

Boðið er upp á skuldbreytingu vanskila samhliða frystingu og einnig samning um greiðslu vanskila.  Ef þessi úrræði duga ekki þá vísar Íbúðalánasjóður viðkomandi á umboðsmann skuldara, segir í tilkynningu.

Dugar að fá staðfestingu frá umboðsmanni um að leitað hafi verið aðstoðar

„Frá því að embætti umboðsmanns skuldara var sett á fót hefur ÍLS afturkallað uppboð eingöngu með því að fá staðfestingu umboðsmanns á því að einstaklingurinn hafi leitað til hans óháð niðurstöðu umboðsmanns.  Margir hafa nýtt sér þetta en ekki er komið í ljós hvort þetta er lausn fyrir skuldarana.  Í þeim tilfellum þar sem framhaldsuppboð fer fram samþykkir Íbúðalánasjóður í öllum tilfellum lengri samþykkisfrest og þá eins langan og sýslumaður er tilbúinn að veita.

Nokkuð er um að  nauðungarsölur eru afturkallaðar á samþykkisfresti, en samþykkisfrestur er sá viðbótartími sem gerðarþola er veittur til að ganga til samninga við kröfuhafa þannig að þeir falli frá uppboði.

Að lokum er rétt að benda á að í þeim tilvikum sem nauðungarsala fer fram er íbúum eignanna ávallt boðið að leigja íbúðina.  Um er að ræða leigusamninga til a.m.k. eins árs.  Fyrir liggur frumvarp félags- og tryggingamálaráðherra, sem heimilar Íbúðalánasjóði að selja þær íbúðir, sem sjóðurinn hefur eignast við nauðungarsölu, með kaupleiguréttarformi.  Fari svo að frumvarpið verði samþykkt á Alþingi mun núverandi leigjendum Íbúðalánasjóðs verða boðið að gera nýjan kaupréttarsamning í stað leigusamnings," segir í tilkynningu frá Íbúðalánasjóði.