Kristinn Hrafnsson ásamt fleiri fulltrúum WikiLeaks á blaðamannafundi í Lundúnum nýlega. Reuters

Kristinn Hrafnsson blaðamaður hefur stofnað fyrirtækið Sunshine Press Productions ehf. hér á landi ásamt Inga Ragnari Ingasyni kvikmyndagerðarmanni og Julian Assange, stjórnanda uppljóstrunarvefjarins WikiLeaks. Fyrirtækið er eitt af nokkrum í heiminum sem tengjast starfsemi vefsíðunnar.

Kristinn segir í samtali við mbl.is að félagið hafi verið stofnað í síðasta mánuði og engin eiginleg starfsemi sé hafin. Vísað er á það á vef WikiLeaks.

Hann segir jafnframt að verið sé að stofna svipað fyrirtæki í Svíþjóð og nú þegar séu fyrirtæki starfandi í Frakklandi og í Ástralíu, en Sunshine Press í Ástralíu er formlegur rekstraraðili Wikileaks. 

Kristinn vill lítið segja um áform fyrirtækisins hér á landi. Hins vegar bendir hann á að starfsemin í kringum WikiLeaks vefinn sé smátt og smátt að þenjast út og að skipulagið sé að batna. Flestir muni þó áfram starfa í sjálfboðavinnu fyrir vefinn.

Tekur á sig nýja mynd

„Það kann að að koma til þess að Wikileaks fari út í meiri vinnslu á grundvelli þess efnis sem er að berast á vefinn. Það er hugsunin,“ segir Kristinn. Aðspurður segir hann fjölmörg spennandi verkefni framundan án þess að vilja tjá sig nánar um þau.

„Þetta er að taka á sig nýja mynd í þessu umbreytingaskeiði sem er að verða á samtökum sem eru að eðlisbreytast í samræmi við þau verkefni sem þau eru að taka að sér og vinna að.“ 

Spurður um viðbrögð, bæði almennings og fjölmiðla, við birtingu skjala um starfsemi Bandaríkjahers í Írak segir hann: „Þetta hefur gengið vonum framar. Menn eru aðeins að venjast þessu fyrirbæri og fá aukinn skilning á því hvaða hugmyndir liggja þarna að baki. Ólíkt sem gerðist í tengslum við birtingu skjalanna frá Afganistan í enda júlí, þá er meiri fókus núna á efnisatriði þess sem verið er að leka og koma á framfæri, heldur en hinu að gera sér mat úr lekanum sjálfum. Eða Wikileaks eða stofnandanum og ritstjóranum Julian. Það er ánægjuefni,“ segir Kristinn Hrafnsson.