Skúli Eggert Þórðarson, ríkisskattstjóri. mbl.is/Kristinn

Skattayfirvöld eru með hátt í hundrað mál í vinnslu vegna skattálagningar á söluréttarsamningum. Málin tengjast að minnsta kosti tveimur bönkum og þremur fyrirtækjum. Fyrr í vikunni dæmdi Héraðsdómur Reykjavíkur fyrrum yfirmann lögfræðisviðs Kaupþings til þess að greiða tekjuskatt af hagnaði af kaupum á hlutabréfum í bankanum.

Í Viðskiptablaðinu í dag kemur fram að tugir mála eru til rannsóknar hjá ríkisskattstjóra vegna skattálagningar á söluréttarsamningum sem fyrirtæki gerðu við starfsmenn sína. Málin snerta meðal annars samninga sem gerðir voru við starfsmenn Kaupþings, Glitnis, Atorku, Actavis og Nýherja, samkvæmt heimildum Viðskiptablaðsins.

Talið rangt fram Að mati skattayfirvalda var rangt farið með hagnað sem hlaust af slíkum samningum. Skúli Eggert Þórðarson ríkisskattstjóri segir að embætti hans telji að skattstofn hafi átt að vera hærri. Um sé að ræða launatekjur en ekki fjármagnstekjur líkt og þeir sem höfðu slíka samninga töldu fram.

„Stundum gerist það að menn finna upp aðferðir og telja sig með þeim geta komist undan skattlagningu. Söluréttarsamningar og hvernig þeir voru taldir fram er eitt af því sem skattayfirvöld hafa ekki verið sammála um.,“  segir Skúli Eggert í samtali við Viðskiptablaðið í dag. Hann staðfestir að rannsóknin beinist ekki einungis að starfsmönnum fjármálafyrirtækja heldur einnig annarra fyrirtækja.