Hluti af amfetamíninu sem fannst í bíl kvennanna. mbl.is/Júlíus

Hæstiréttur hefur staðfest úrskurð Héraðsdóms Reykjaness um að þýsk kona, sem handtekin var ásamt annarri konu í sumar vegna fíkniefnasmygls, sæti áfram gæsluvarðhaldi til 2. desember. Hin konan sætir farbanni.

Konan, sem er í gæsluvarðhaldi, er grunuð um að hafa ætlað að smygla tæpum 20 lítrum af amfetamínbasa til landsins. Búið er að flytja mál, sem höfðað var á hendur konunni, og er dóms beðið. 

Konurnar voru handteknar í júní þegar þær komu til landsins með Norrænu en í amfetamínbasinn fannst í bensíntanki í bíl kvennanna. Talið var að úr amfetamínbasanum væri hægt að búa til rúmlega 264 kg af amfetamíni, sem svarar til næstum allrar ársneyslu á Íslandi af þessu efni.

Grunur leikur á, að Lithái, sem dæmdur var hér árið 2006 í 4 ára fangelsi fyrir að flytja inn amfetamínvökva og brennisteinssýru, tengist málinu. Óskaði lögreglan hér á landi eftir því við lögregluna í Litháen að maðurinn yrði handtekinn og yfirheyrður en ekki hefur tekist að hafa uppi á honum.