Ásdís Ásgeirsdóttir

Frá árinu 1960 hafa alls sjö kynferðisbrotamál komið fram með vitneskju umsjónarmanna safnaða Votta Jehóva á Íslandi. Aðeins 5 þeirra hafa tengst söfnuðinum með beinum hætti. Stjórn trúfélagsins segir fullyrðingar um yfirhylmingu slíkra mála innan safnaðarins ekki eiga við nein rök að styðjast.

Fjögur málanna komu upp á árunum 1960 til 1990 og af þeim voru tvö sem voru söfnuðinum óviðkomandi, þar sem gerandinn var ekki Vottur Jehóva. Þrjú mál til viðbótar hafa svo komið upp á síðustu 20 árum. Eitt þeirra var kært til lögreglu og fór í gegnum réttarkerfið. Þrjú málanna eru ásakanir um káf, sem aðstandendur ákváðu að kæra ekki til lögreglu. Eitt málanna er nýlega komið fram en varðar ofbeldi fyrir meira en 40 árum. Lögregla var látin vita af ásökununum en vildi ekkert aðhafast vegna þess að málið var löngu fyrnt.

Þetta kemur fram í yfirlýsingu frá stjórn Votta Jehóva í dag. Tilefnið er fréttaflutningur síðustu daga um meðferð kynferðisbrota innan safnaðarins. Í yfirlýsingunni segir að stjórnendur safnaða Votta Jehóva komi ekki á nokkurn hátt í veg fyrir að málin rati til lögreglu. Einnig er tekið fram að ekkert sérstakt barnastarf fari fram innan safnaðanna þar sem börnum gæti hugsanlega stafað hætta af einstaklingum sem misnoti börn. Stjórnendur safnaðanna hafi fengið skýrar leiðbeiningar um hvernig skuli taka á kynferðisbrotamálum í samræmi við landslög.

Lesa má yfirlýsingu stjórnar trúfélagsins í heild hér að neðan.