Bragi Guðbrandsson. Golli / Kjartan Þorbjörnsson

Regluverkið sem Vottar Jehóva á Íslandi hafa sett sér um viðbrögð við kynferðisbrotamálum innan safnaðarins eru í samræmi við barnaverndarlög, að sögn Braga Guðbrandssonar forstöðumanns Barnaverndarstofu.

Í kjölfar fréttaflutnings í fjölmiðlum síðustu daga um kynferðisbrot innan safnaðarins óskaði Bragi eftir fundi með forystumönnum Votta Jehóva til þess að fara yfir þessi mál. „Ég taldi rétt af þessu tilefni að ganga úr skugga um það hvað verklagsreglur, ef einhverjar, væru í gildi hjá þessu trúfélagi," segir Bragi. Niðurstaðan er að þessi mál virðist vera í góðum farvegi hjá vottum Jehóva.

„Þeir gáfu út reglur fyrir rúmlega 10 árum síðan sem eru nokkuð ítarlegar og sem hefur verið dreift til safnaða í landinu.Í þessum verklagsreglum er fjallað um og vísað í ákvæði í barnaverndarlögum sem varða tilkynningaskyldu og það brýnt fyrir safnaðardeildum að bregðast við í samræmi við ákvæði laganna um tilkynningaskyldu til barnaverndaryfirvalda, ef mál af þessu tagi kæmu upp."

Braga var svo tjáð að á þessum 10 árum hefði eitt mál komið upp innan safnaðarins og ferli þess máls lýst fyrir honum. Bragi segir að verklagsferlið sé í raun mjög svipað þeim starfsreglum sem gildi í skólum landsins, þar sem lögð er áhersla á að skólastjóri komi að því. Í tilfelli Votta Jehóva fara mál úr deildum safnaðarins í gegnum „höfuðstöðvarnar" í Reykjavík og þaðan til barnaverndaryfirvalda.

Barnaverndarstofa leggur að sögn Braga áherslu á það að stofnanir þar sem börn eru, s.s. á sviði heilbrigðisþjónustu og mennta móti sér verklag sem tryggi góða og rétta málsmeðferð þegar mál af þessu tagi koma upp. „Og það skiptir auðvitað miklu máli að trúfélög setji sér slíkar verklagsreglur líka og þessi fundur leiddi það í ljós að það hefur verið gert innan Votta Jehóva."