Merki BHM

Bandalag háskólamanna harmar að samráðsferli flutnings málefna fatlaðra frá ríki til sveitarfélaga skuli komið í erfiða stöðu og að Samband íslenskra sveitarfélaga hafi klofið sig úr samstarfi. Þess er auk þess krafist að vinna nefndar á vegum félagsmálaráðuneytis haldi áfram.

Um er að ræða samráðshóp á vegum félagsmálaráðuneytisins þar sem stéttarfélögin og heildarsamtök þeirra, ásamt fulltrúum frá Sambandi íslenskra sveitarfélaga  og Reykjavíkurborg, hafa unnið að réttinda- og hagsmunamálum starfsmanna. því þó flutningur málaflokksins snerti helst fatlað fólk og aðstandendur þeirra hefur hann einnig mikil ahrif á starfsvettvang um 1.500 manna.

Í tilkynningu frá BHM segir að fram til loka síðasta árs hafi starf nefndarinnar gengið vel.Þegar í ljós að kom í lok janúar sl. að ágreiningur  var á milli aðila um grundvallarþætti á borð við félagafrelsi, starfsöryggi og að starfsmenn nytu sömu réttinda og opinberir starfsmenn höfðu árin 1990 og 1996 við yfirflutning á heilbrigðisþjónustu  og grunnskólanum, sigldi samstarfið í strand.

Sveitarfélögin haga starfsmannamálum

Ekki var boðað til fundar í tíu mánuði eða fyrr en 7. október. Síðan þá hefur einn annar fundur verið haldinn en á honum lýsti fulltrúi Sambands íslenskra sveitarfélaga, Karl Björnsson framkvæmdastjóri, því yfir að ekki væri ástæða til að nefndin starfaði áfram, þar sem hún væri fallin á tíma.

Karl sagði einnig að af því leiddi að sveitarfélögin myndu því haga starfsmannamálum með þeim hætti sem þau kysu sjálf. Þessu til áréttingar dreifði Karl bæklingi til fundarmanna um væntanlegt starfsumhverfi starfsmanna.

BHM lýsir í tilkynningu vanþóknun sinni á þessari framkomu og krefst þess skilyrðislaust að vinna nefndarinnar til tryggingar á réttindum starfsmanna haldi áfram.  Þess er krafist að fullt tillit verði tekið til sjónarmiða stéttarfélaganna enda samræmast þau áður viðhöfðum vinnubrögðum hins opinbera þegar málefni hafa flust milli stjórnsýslustiga.  Annað sé mismunun sem verði ekki liðin.