Þórhalli Jósepssyni fréttamanni var sagt upp störfum hjá fréttastofu Ríkisútvarpsins. Árni Sæberg

Stjórn Félags fréttamanna (FF) við Ríkisútvarpið mun ekki álykta vegna uppsagnar Þórhalls Jósepssonar fréttamanns, að sögn Aðalbjörns Sigurðssonar formanns FF. Þórhallur er í stjórn FF og varaformaður félagsins.

Aðalbjörn sagði þær reglur gilda um fréttamenn Ríkisútvarpsins, líkt og annarra fjölmiðla, að þeir megi ekki taka að sér hvaða verkefni sem er. Þetta eigi t.d. við um að fara í pólitík. Þeir geti ekki heldur tekið að sér störf sem geti mögulega haft áhrif á fréttaflutning eða trúverðugleika nema að ráðfæra sig áður við yfirmenn sína.

Aðalbjörn taldi málið ekki snúast um viðmælanda Þórhalls í bókinni, sem er Árni M. Mathiesen, fyrrverandi ráðherra, heldur að hann skyldi vinna að skrifunum á sama tíma og hann sinnti fréttaflutningi.

Einnig að hann hafi ekki sagt neinum frá því. „Það er litið á það sem trúnaðarbrest milli Þórhalls og stjórnenda fréttastofu. Við gerum ekki athugasemd við þá túlkun,“ sagði Aðalbjörn.

Hann kvaðst sjá eftir Þórhalli því hann sé vandaður og góður fréttamaður.