Hörður Arnarson á haustfundi Landsvirkjunar í dag. mbl.is/Eggert

Stjórnendur Landsvirkjunar gera ráð fyrir að fyrirtækið muni tvöfaldast að stærð á næstu 20 árum, en að tekjur þess muni fimmfaldast á sama tíma. Ástæðan fyrir þessu er hækkandi verð á raforku. Þetta kom fram hjá Herði Arnarssyni, forstjóra Landsvirkjunar, á haustfundi fyrirtækisins.

Á síðustu 15 árum þrefaldaðist orkuvinnsla Landsvirkjunar. Hörður sagði að það væri því gert ráð fyrir hægari vexti á næstu árum en verið hefði. Tekjurnar myndu hins vegar vaxa mun hraðar. Arðsemi fyrirtækisins myndi því vaxa á næstu árum og það gæti farið að borga umtalsverðan arð til ríkisins árið 2016.

Hörður sagði að fram til aldamóta hefði verð á rafmagni á alþjóðlegum mörkuðum verið lágt. Mikil umframorka hefði verið í kerfinu og flest orkufyrirtæki hefðu verið undir stjórn hin opinbera. Þetta lága verð hefði takmarkað möguleika Landsvirkjunar í orkusölusamningum við stóra kaupendur.

Hörður sagði að frá árinu 2000 hefði verð á raforku farið hækkandi í heiminum og allar spár gerðu ráð fyrir að það ætti enn eftir að hækka. Þessi þróun hefði áhrif á Íslandi t.d. þegar kæmi að því að endurnýja orkusamninga til lengri tíma við stóra kaupendur. Eins myndu nýir viðskiptavinir Landsvirkjunar þurfa að taka tillit til verðþróunar á raforku.

Hörður fjallaði sérstaklega um fjárfestingar í orkuvinnslu á Norðausturlandi, þ.e. í Kröflu, Bjarnarflagi og Þeistareykjum. Hann sagði alveg ljóst að Landsvirkjun gæti ekki útvegað orku til álvers af stærðinni 346 þúsund tonn, líkt og álver Alcoa á Reyðarfirði. Það væri hins vegar hugsanlegt að Landsvirkjun gæti með virkjunum á Norðausturlandi útvegað orku fyrir 250 þúsund tonna álver.

Hörður sagði að áætlanir Landsvirkjunar miðuðu við að virkja í nokkrum smáum skrefum á Norðausturlandi. Miðað væri við að taka eina túrbínu í notkun á þriggja ára fresti. Ef stórir kaupendur væru að orkunni væri hugsanlegt að taka stærri skref, en þá yrði t.d. virkjanir fyrir 250 þúsund tonna álver teknar í notkun á 7-8 árum.