Þingmenn Hreyfingarinnar. mbl.is

Þingmenn Hreyfingarinnar hafa lagt fram þingsályktunartilllögu um að sjáfstæð og óháð rannsókn fari fram á forsætisráðuneyti, fjármálaráðuneyti og viðskiptaráðuneyti og starfsháttum þeirra frá ársbyrjun 2007 til loka september 2010.

Taki rannsóknin sérstaklega til samskipta við önnur ráðuneyti, Seðlabanka Íslands og Fjármálaeftirlitið, ákvarðana sem voru teknar í viðkomandi ráðuneytum á tímabilinu og atburða sem tengjast falli bankanna.

Í greinargerð með tillögunni segir, að ljóst þyki að í aðdraganda hrunsins hafi mikilvægar ákvarðanir verið teknar án umræðu í ríkisstjórn og séu dæmi um að viðkomandi fagráðherrar hafi ekki verið boðaðir á fundi um málefni sem heyrðu undir þeirra ábyrgðarsvið.

Þá sé það ein af niðurstöðum þingmannanefndar, sem fjallaði um skýrslu rannsóknarnefndar Alþingis, að ábyrgð og eftirlit fagráðherra með sjálfstæðum stofnunum virðist hafa verið verulega ábótavant.

Í ljósi þessa sé brýnt, að gerð verði rannsókn á þeim ráðuneytum sem fjallað er um í skýrslu rannsóknarnefndar Alþingis.