Vinnumálastofnun Ómar Óskarsson

Skráð atvinnuleysi í október 2010 var 7,5% en að meðaltali 12.062 manns voru atvinnulausir í október og eykst atvinnuleysi um 0,4 prósentustig frá september, eða um 515 manns að meðaltali. Atvinnuleysið er 7,8% meðal karla og 7,2% meðal kvenna.

Körlum á atvinnuleysisskrá fjölgar um 416 eða um 0,6 prósentustig að meðaltali og konum um 99 að meðaltali eða um 0,3 prósentustig.

Mest fjölgar atvinnulausum hlutfallslega á Vesturlandi en þar fjölgar um 58 manns á atvinnuleysisskrá að meðaltali. Atvinnuleysið er 8,4% á höfuðborgarsvæðinu en 5,9% á landsbyggðinni. Mest er það á Suðurnesjum 12,2%, en minnst á Norðurlandi vestra 2,5 %.

Alls voru 13.280 atvinnulausir í lok október. Þeir sem voru atvinnulausir að fullu voru hins vegar 10.914, af þeim voru 3.824 í einhvers konar úrræðum á vegum Vinnumálastofnunar, auk þess sem mikill fjöldi fer í ráðgjafarviðtöl, á kynningarfundi og í vinnumiðlun.

Fjölgun atvinnulausra í lok októbermánaðar frá lokum september nam 630 en 495 fleiri karlar voru á skrá og 135 fleiri konur. Á landsbyggðinni fjölgar um 317 en um 313 á höfuðborgarsvæðinu.

54% atvinnulausra hafa verið atvinnulausir í sex mánuði eða lengur

Fjöldi þeirra sem hafa verið atvinnulausir lengur en 6 mánuði er nú 7.205 og fækkar um 65 frá lokum september og er um 54% þeirra sem eru á atvinnuleysisskrá í lok október. Þeim sem verið hafa atvinnulausir í meira en eitt ár fjölgar úr 4.534 í lok september í 4.614 lok október.

Alls voru 2.168 á aldrinum 16‐24 ára atvinnulausir í lok október en 1.996 í lok september eða um 16% allra atvinnulausra í október og fjölgar um 172 frá því í september.

Í október 2009 var fjöldi atvinnulausra ungmenna 2.538 og hefur því fækkað um 370 frá október 2009.

Alls voru 2.147 erlendir ríkisborgarar án atvinnu í lok október, þar af 1.297 Pólverjar eða um 60% þeirra útlendinga sem voru á skrá í lok mánaðarins. Langflestir atvinnulausra erlendra ríkisborgara voru starfandi í byggingariðnaði eða 543.

Spá auknu atvinnuleysi í nóvember

Í nóvember 2009 var atvinnuleysi 8% og jókst úr 7,6 % í október. Vinnumálastofnun áætlar að atvinnuleysið í nóvember aukist og verði á bilinu 7,6 %‐8 %.