Uppsögn Þórhalls Jósepssonar, fréttamanns hjá Ríkisútvarpinu (RÚV), var rædd á Alþingi í gær. Össur Skarphéðinsson utanríkisráðherra taldi forkastanlegt að fréttamanninum hefði verið sagt upp fyrir að skrifa samtalsbók við fyrrverandi stjórnmálamann.

Þórhallur kveðst hafa tilkynnt Óðni Jónssyni, fréttastjóra RÚV, snemma í janúar á þessu ári að hann hygðist hefja ritun bókar með fyrrverandi ráðherra. Hvers vegna nafngreindi hann ekki ráðherrann fyrrverandi í samtalinu?

„Þetta var ekki afráðið og þess vegna vildi ég ekki segja þá hver það væri,“ sagði Þórhallur. Hann segir að Óðinn hafi ekki spurt hann um verkefnið né viðmælandann eftir það. Hann hafi heldur ekki upplýst Óðin um það nánar.

„Ég ræddi þetta ekkert meira. Ég fór af þeim fundi í þeirri öruggu vissu – góðri trú eins og það heitir á lagamáli – að þetta væri í fínasta lagi,“ sagði Þórhallur. Tilefni uppsagnarinnar er sagt vera trúnaðarbrestur, að því er fram kemur í umfjöllun um þetta mál í Morgunblaðinu í dag.