Fara verður eftir reglunum
Breiðavík. mbl.is/Ómar
Forstjóri Póst- og fjarskiptastofnunar (PFS) segist hafa fullan skilning á umkvörtun bóndans og hótelstjórans á Breiðavík, sem er ósáttur við ákvörðun stofnunarinnar um að hætta að aka pósti til Breiðavíkur. PFS verði hins vegar að fara eftir gildandi reglum í sínum ákvörðunum.
Hrafnkell V. Gíslason, forstjóri PFS, segir í samtali við mbl.is að þetta sé ekki eina ákvörðunin af þessu tagi „þar sem menn eru að túlka hvar liggur ytri jaðar póstdreifingarsvæðisins. Það er í raun og veru það sem þetta snýst um,“ segir Hrafnkell, eða þá vegalengd sem Íslandspóstur þurfi að aka að bænum.
„Vissulega er þetta ákveðin skerðing á þjónustu við þetta fólk, það er alveg ljóst. En okkur ber að túlka þessar reglur - hvar þessi ytri jaðar liggur - og gerum það á grundvelli þeirra gagna sem fram eru lögð hverju sinni.“
Fallist á varakröfu en aðalkröfu hafnað
Í síðasta mánuði féllst PFS á varakröfu Íslandspósts að íbúðarhús á Breiðavík séu staðsett langt utan við almenna byggð í skilningi reglugerðar um alþjónustu og og framkvæmd póstþjónustu. Er Íslandspósti því heimilt að staðsetja bréfakassa við gatnamót 615 Kollsvíkurvegar, sem er í töluverðri fjarlægð frá bænum. PFS hafnaði aðalkröfu fyrirtækisins um að hætta dreifingu á bæinn.
Keran Ólafsson, bóndi og hótelstjóri, segir í samtali við vestfirska fréttamiðilinn Bæjarins besta að ákvörðunin sé vonbrigði. Hann telur umsvif sína á Breiðavík meiri en gengur og gerist á venjulegum sveitaheimilum. Hann reki Hótel Breiðavík sem hafi fengið 12.000 gesti í sumar, tekið sé á móti hundruðum póstkorta á mánuði og þá reki hann stórt sauðfjárbú.
Rétt niðurstaða miðað við gildandi reglur
„Við teljum að þetta sé rétt niðurstaða miðað við þessar reglur. Hvort að reglurnar séu of íþyngjandi fyrir aðila eða ekki er pólitísk spurning,“ segir Hrafnkell.
Stofnunin hafi ríka samúð með þeim sem verði fyrir svona skerðingu. „En það breytir ekki því að svona eru þessar reglur settar upp. Við sem dómarinn á þessum leikvelli verðum að dæma eftir reglunum,“ segir Hrafnkell.
Fram kemur í ákvörðun PFS að Keran geti farið með málið fyrir kærunefnd póst- og fjarskiptamála. Einnig sé hægt að fara með málið fyrir dómstóla.
Þá kvartar Keran einnig undan því að hvorki náist GSM- né 3G-samband á svæðinu þrátt fyrir að svæðið sé merkt með þeim hætti. Einnig að ekki sé búið að setja upp háhraðanet og þá nást ekki sjónvarpsútsendingar.
Hrafnkell segir að sjónvarpsstöðvarnar verði að svara fyrir það hvers vegna útsendingar náist ekki. Þau sjái alfarið um sín dreifikerfi.
Þá verði fjarskiptafyrirtækin að svara varðandi sína þjónustu. Þau sjái sjálf um að birta kort sem sýni dreifingu þjónustu á landinu.
Loks sé háhraðanetið verkefni sem heyri undir fjarskiptasjóð hjá samgönguráðuneytinu.
