Steinþór Pálsson, bankastjóri Landsbankans, var ánægður með samráðsfund stjórnvalda og hagsmunaaðila, sem lauk nú á fimmta tímanum. Hann segir að skýrsla sérfræðingahóps um mismunandi leiðir vegna skuldavanda heimilanna hafi gert mikið gagn.
„Þannig að menn sjá hver vandinn er. Og ég held að í framhaldinu muni menn reyna að sníða lausnirnar. Það þarf að gera það í vinnuhóp meira,“ segir hann í samtali við mbl.is.
Hann telur að það sé samhljómur fyrir því að menn skoði einhverja blandaða leið. Nú verði unnið hratt.
Aðspurður kveðst hann vera bjartsýnn á framhaldið. „Það er ekki annað hægt. Maður verður að vera bjartsýnn,“ segir Steinþór, sem vonast eftir því að menn komist að niðurstöðu sem fyrst.
„Þegar það er búið að draga línuna í sandinn þá er svo mikið verk að fara vinna með fólki og hjálpa því. Við megum ekki eyða öllum tímanum í að búa til lausnina. Við þurfum að hafa tíma til að vinna með fólkinu áður en það verður of seint.“